(moviemax.in) സോഷ്യൽ മീഡിയയിലൂടെ ഏതു കാര്യവും ഞൊടിയിടയിൽ തരംഗമാകുന്ന ഈ കാലത്ത്, ഇൻസ്റ്റാഗ്രാം റീലുകളിൽ ഇപ്പോൾ തരംഗം സൃഷ്ടിക്കുന്നത് വർഷങ്ങൾക്ക് മുൻപ് ഇറങ്ങിയ ഒരു പഴയ ഗാനമാണ്. 'മയിലാട്ടം..' എന്ന് തുടങ്ങുന്ന ഈ പാട്ടിന് ചുവടുവച്ച് മില്യൺ കണക്കിന് ആളുകളാണ് റീലുകൾ ചെയ്തിരിക്കുന്നത്. വ്യക്തികളും പാട്ടുകളും ഡയലോഗുകളുമെല്ലാം ഇത്തരത്തിൽ വീണ്ടും വൈറലാകുന്നത് പതിവാണെങ്കിലും, 'മയിലാട്ടം' എന്ന ഗാനത്തിന്റെ കുതിപ്പ് ശ്രദ്ധേയമാണ്. ഈ പാട്ടിന്റെ പശ്ചാത്തലം എന്താണെന്ന് പരിശോധിക്കാം.
1999 ജൂണിൽ പുറത്തിറങ്ങിയ ഒരു തമിഴ് ഫോക്ക് ഗാനമാണ് കാൽനൂറ്റാണ്ടിന് ശേഷം ഇൻസ്റ്റാഗ്രാം റീലുകളിൽ തരംഗമായി മാറുന്നത്. പാട്ടിന്റെ ഇടയ്ക്കുള്ള 'മയിലാട്ടം..' എന്ന് തുടങ്ങുന്ന ഭാഗമാണ് വൈറലായതെങ്കിലും 'കാക്കാ.. ഇല്ല സീമയിലേ..' എന്നാണ് ഈ ഗാനത്തിന്റെ തുടക്കം. പ്രശസ്ത തമിഴ് ഫോക്ക് ഗായകൻ പുഷ്പവനം കുപ്പുസാമിയാണ് ഈ ഊർജ്ജസ്വലമായ ഗാനം ആലപിച്ചിരിക്കുന്നത്. അജയ് സംഗീത സംവിധാനവും അംബികാപതി വരികളും നിർവഹിച്ചു.
പുറത്തിറങ്ങി 26 വർഷമായെങ്കിലും യുട്യൂബിൽ ഈ ഗാനം എത്തിയിട്ട് ഏതാനും വർഷങ്ങളെ ആകുന്നുള്ളൂ. തമിഴ്നാട്ടിലെ സ്റ്റേജ് പ്രോഗ്രാമുകളിലും ഗ്രൂപ്പ് ഡാൻസുകളിലും നേരത്തെ തന്നെ ഹിറ്റായിരുന്ന ഈ പാട്ട്, റീലുകളിലൂടെ ഇപ്പോൾ കേരളത്തിലും വലിയ തരംഗമാണ് സൃഷ്ടിച്ചിരിക്കുന്നത്. ഇൻസ്റ്റാഗ്രാമിലെ വൈറൽ ക്ലിപ്പിന് പിന്നാലെ യഥാർത്ഥ പാട്ട് തേടി യുട്യൂബിൽ എത്തുന്നവരിൽ ഭൂരിഭാഗവും മലയാളികളാണെന്ന് കമന്റ് ബോക്സുകൾ സാക്ഷ്യപ്പെടുത്തുന്നു. "കേരളക്കരയിൽ എങ്ങും മയിലാട്ടം" എന്നാണ് മലയാളികൾ ഈ ഗാനത്തിന് നൽകുന്ന സ്നേഹവായ്പ്.
How did that Tamil song from 26 years ago become a hit on reels? This is the story of 'Mayilattam'!
