(moviemax.in) ആര്യയും മഞ്ജു വാര്യരും പ്രധാന വേഷങ്ങളിലെത്തിയ 'മിസ്റ്റർ എക്സ്' ഏപ്രിൽ 17-ന് തിയറ്ററുകളിലെത്തി. ഇന്റലിജൻസ് ലോകത്തെ ആകാംക്ഷാനിർഭരമായ കഥ പറയുന്ന ഈ സ്പൈ ആക്ഷൻ ത്രില്ലർ സംവിധാനം ചെയ്തത് മനു ആനന്ദാണ്.
വിഷ്ണു വിശാൽ നായകനായ 'എഫ്ഐആർ' എന്ന ഹിറ്റ് ചിത്രത്തിന് ശേഷം മനു ഒരുക്കിയ ഈ ചിത്രത്തിന് സിനിമാ പ്രേമികളിൽ നിന്ന് മികച്ച അഭിപ്രായമാണ് ലഭിക്കുന്നത്. എന്നാൽ, ഈ നല്ല പ്രതികരണം ബോക്സ് ഓഫീസ് കളക്ഷനിൽ പൂർണ്ണമായും പ്രതിഫലിക്കുന്നില്ലെന്നാണ് റിപ്പോർട്ടുകൾ സൂചിപ്പിക്കുന്നത്.
കുറഞ്ഞ ഷോകൾ മാത്രമാണ് ചിത്രത്തിന് ലഭിച്ചിട്ടുള്ളത് എന്നത് കളക്ഷനെ ബാധിക്കുന്നുണ്ട്. ആദ്യ ഘട്ട കണക്കുകൾ പ്രകാരം 2892 ഷോകളിൽ നിന്നായി ഏകദേശം 1.36 കോടി രൂപയാണ് ചിത്രം സ്വന്തമാക്കിയത്.
രാജ്യസുരക്ഷയെ ബാധിക്കുന്ന അഞ്ച് നിർണ്ണായക സംഭവങ്ങളെ ഇന്റലിജൻസ് ഏജൻസികൾ എങ്ങനെ തടഞ്ഞു എന്ന പ്രമേയത്തിലാണ് ചിത്രം വികസിക്കുന്നത്. ശരത് കുമാർ, ഗൗതം കാർത്തിക്, അതുല്യ രവി, അനഘ, റൈസ വിൽസൺ എന്നിങ്ങനെ വലിയൊരു താരനിര തന്നെ അണിനിരക്കുന്ന ഈ ചിത്രം നിർമ്മിച്ചിരിക്കുന്നത് വിനീത് ജെയിനും എസ് ലക്ഷ്മൺ കുമാറും ചേർന്നാണ്.
രാജസ്ഥാൻ, മൈസൂർ, ചെന്നൈ തുടങ്ങി ഇന്ത്യയിലെ വിവിധ സ്ഥലങ്ങളിലും അസർബൈജാനിലുമായി നൂറോളം ദിവസങ്ങളെടുത്താണ് ചിത്രീകരണം പൂർത്തിയാക്കിയത്. അരുൺ വിൻസന്റിന്റെ ഛായാഗ്രഹണവും ദീപു നൈനാൻ തോമസിന്റെ സംഗീതവും ചിത്രത്തിന് കരുത്ത് പകരുന്നു.
മിസ്റ്റർ എക്സ് എന്ന ഈ സ്പൈ ത്രില്ലർ വരും ദിവസങ്ങളിൽ കൂടുതൽ സ്ക്രീനുകളിലേക്ക് എത്തുമെന്നും കളക്ഷനിൽ മുന്നേറ്റമുണ്ടാക്കുമെന്നുമാണ് അണിയറപ്രവർത്തകരുടെ പ്രതീക്ഷ.
Content Highlight: 'Mr. X' spy thriller gets rave reviews
.jpeg)
