(moviemax.in) ദുൽഖർ സൽമാനെ നായകനാക്കി നഹാസ് ഹിദായത് സംവിധാനം ചെയ്യുന്ന ബിഗ് ബഡ്ജറ്റ് ആക്ഷൻ ത്രില്ലർ "ഐ ആം ഗെയിം" ചിത്രീകരണത്തിന്റെ അവസാന ഘട്ടത്തിലേക്ക് കടക്കുന്നു. നൂറിലധികം ദിവസങ്ങൾ പിന്നിട്ട ചിത്രത്തിന്റെ ആവേശകരമായ ക്ലൈമാക്സ് ഷെഡ്യൂൾ ഹൈദരാബാദിൽ ആരംഭിച്ചു.
"ദ ലാസ്റ്റ് ഡാൻസ്" എന്ന കുറിപ്പോടെ ഛായാഗ്രാഹകൻ ജിംഷി ഖാലിദാണ് ചിത്രീകരണ വിശേഷം സോഷ്യൽ മീഡിയയിലൂടെ പങ്കുവെച്ചത്. ദുൽഖറിന്റെ കരിയറിലെ തന്നെ ഏറ്റവും വലിയ പ്രൊജക്റ്റായി കണക്കാക്കപ്പെടുന്ന ഈ ചിത്രം 2026 ഓണത്തിന് ആഗോളതലത്തിൽ പ്രദർശനത്തിനെത്തും.
വേഫെറർ ഫിലിംസിന്റെ ബാനറിൽ ദുൽഖർ സൽമാനും ജോം വർഗീസും ചേർന്നാണ് ഈ ചിത്രം നിർമ്മിക്കുന്നത്. സജീർ ബാബ, ഇസ്മായിൽ അബൂബക്കർ, ബിലാൽ മൊയ്തു എന്നിവരുടെ രചനയിൽ ഒരുങ്ങുന്ന സിനിമയുടെ സംഭാഷണങ്ങൾ നിർവഹിച്ചിരിക്കുന്നത് ആദർശ് സുകുമാരനും ഷഹബാസ് റഷീദുമാണ്.
ആന്റണി വർഗീസ്, മിഷ്കിൻ, കതിർ, കായദു ലോഹർ തുടങ്ങി വലിയൊരു താരനിര തന്നെ ചിത്രത്തിൽ അണിനിരക്കുന്നുണ്ട്. പാൻ ഇന്ത്യൻ തലത്തിൽ അഞ്ച് ഭാഷകളിലായാണ് ചിത്രം പുറത്തിറങ്ങുന്നത്. അൻപറിവ് മാസ്റ്റേഴ്സ് ഒരുക്കുന്ന ആക്ഷൻ രംഗങ്ങളും ജേക്സ് ബിജോയിയുടെ സംഗീതവും ചിത്രത്തിന്റെ പ്രധാന ആകർഷണങ്ങളാണ്.
സ്റ്റൈലിഷ് ലുക്കിലുള്ള ദുൽഖറിന്റെ പോസ്റ്ററുകൾ ഇതിനോടകം തന്നെ ആരാധകർക്കിടയിൽ വലിയ തരംഗം സൃഷ്ടിച്ചിട്ടുണ്ട്. മാസ്സ് എലമെന്റുകൾക്ക് പ്രാധാന്യം നൽകുന്ന ഈ ചിത്രം മലയാളത്തിന് പുറമെ തമിഴ്, തെലുങ്ക്, ഹിന്ദി, കന്നഡ ഭാഷകളിലും ഒരേസമയം റിലീസ് ചെയ്യും.
Dulquer Salmaan's film 'I Am Game' enters final stages
.jfif)
