---
title: "ജനാധിപത്യത്തിന്റെ കാവലാളായി മലയാള സിനിമ; ക്യൂ നിന്ന് വോട്ട് രേഖപ്പെടുത്തി താരങ്ങൾ, മാറ്റമുണ്ടാകുമെന്ന് പ്രതികരണങ്ങൾ"
english_title: "Celebrities cast their votes while standing in line"
publisher: "moviemax.in"
canonical_url: "https://moviemax.in/news/352434/celebrities-cast-their-votes-while-standing-in-line"
published_at: "2026-04-09T13:01:00+05:30"
category: "Malayalam"
language: "ml"
image: "https://cf.zdn.im/img/truevisionnews.com/0/image-uploads/69d755c74c866_11.jpg"
keywords: []
---

# ജനാധിപത്യത്തിന്റെ കാവലാളായി മലയാള സിനിമ; ക്യൂ നിന്ന് വോട്ട് രേഖപ്പെടുത്തി താരങ്ങൾ, മാറ്റമുണ്ടാകുമെന്ന് പ്രതികരണങ്ങൾ

> **Lead Summary:** **[** ജനാധിപത്യത്തിന്റെ വലിയ ഉത്സവമായ വോട്ടെടുപ്പിൽ സജീവ പങ്കാളിത്തവുമായി മലയാള സിനിമയിലെ പ്രമുഖ താരങ്ങൾ. രാവിലെ ഏഴ് മണിക്ക് വോട്ടെടുപ്പ് ആരംഭിച്ചപ്പോൾ തന്നെ സംസ്ഥാനത്തിന്റെ വിവിധ ഭാഗങ്ങളിലെ പോളിങ് ബൂത്തുകളിൽ താരങ്ങളുടെ നിര ദൃശ്യമായി.

## Article Content

**[** ജനാധിപത്യത്തിന്റെ വലിയ ഉത്സവമായ വോട്ടെടുപ്പിൽ സജീവ പങ്കാളിത്തവുമായി മലയാള സിനിമയിലെ പ്രമുഖ താരങ്ങൾ. രാവിലെ ഏഴ് മണിക്ക് വോട്ടെടുപ്പ് ആരംഭിച്ചപ്പോൾ തന്നെ സംസ്ഥാനത്തിന്റെ വിവിധ ഭാഗങ്ങളിലെ പോളിങ് ബൂത്തുകളിൽ താരങ്ങളുടെ നിര ദൃശ്യമായി.

പലരും തിരക്കേറിയ ബൂത്തുകളിൽ സാധാരണക്കാരോടൊപ്പം ക്യൂ നിന്ന് വോട്ട് രേഖപ്പെടുത്തിയാണ് മടങ്ങിയത്. സൂപ്പർ താരങ്ങളായ മമ്മൂട്ടിയും മോഹൻലാലും ആദ്യ മണിക്കൂറുകളിൽ തന്നെ വോട്ട് രേഖപ്പെടുത്തി.

തിരുവനന്തപുരം നേമം മണ്ഡലത്തിലെ മുടവൻമുഗൾ എൽപി സ്കൂളിലെത്തിയ മോഹൻലാൽ, തന്റെ കടമ പൂർത്തിയാക്കിയെന്നും ഇനി കേരളത്തിന്റെ ഊഴമാണെന്നും സോഷ്യൽ മീഡിയയിലൂടെ കുറിച്ചു. എറണാകുളം പൊന്നുരുന്നി ക്രൈസ്റ്റ് കിംഗ് കോൺവെൻഷൻ സ്കൂളിലായിരുന്നു മമ്മൂട്ടി വോട്ട് രേഖപ്പെടുത്തിയത്.

കേരളത്തിൽ ഇത്തവണ വലിയ രാഷ്ട്രീയ മാറ്റങ്ങളും അത്ഭുതങ്ങളും ഉണ്ടാകുമെന്ന് വോട്ട് രേഖപ്പെടുത്തിയ ശേഷം കേന്ദ്രമന്ത്രി സുരേഷ് ഗോപി പ്രതികരിച്ചു. ഗുരുവായൂർ മണ്ഡലത്തിലെ ബൂത്തിലെത്തിയ അദ്ദേഹം ബിജെപി ഇത്തവണ നിർണ്ണായക ശക്തിയായി മാറുമെന്നും പ്രത്യാശ പ്രകടിപ്പിച്ചു.

നടൻ പൃഥ്വിരാജ് സുകുമാരനും ഭാര്യ സുപ്രിയ മേനോനും എറണാകുളം തേവരയിലും, രമേഷ് പിഷാരടി തൃപ്പൂണിത്തുറയിലും വോട്ട് ചെയ്യാനെത്തി. യുഡിഎഫ് അനുകൂല തരംഗമാണ് എല്ലായിടത്തുമുള്ളതെന്ന് പിഷാരടി പ്രതികരിച്ചപ്പോൾ, എല്ലാവർക്കും അഭിപ്രായം പറയാൻ കഴിയുന്ന ഒരു ഭരണകൂടമാണ് വേണ്ടതെന്ന് ആസിഫ് അലി അഭിപ്രായപ്പെട്ടു.

രാഷ്ട്രീയപ്രവേശനത്തെക്കുറിച്ചുള്ള ചോദ്യങ്ങൾക്ക് കഴിവും പ്രാപ്തിയുമുള്ളവർ രാഷ്ട്രീയത്തിലേക്ക് വരുന്നത് നല്ലതാണെന്നും തൽക്കാലം താൻ രാഷ്ട്രീയത്തിലേക്കില്ലെന്നും ടൊവിനോ തോമസ് വ്യക്തമാക്കി.

ഭരണതുടർച്ചയുണ്ടാകുമെന്നും സമാധാനം ആഗ്രഹിക്കുന്നവർ എൽഡിഎഫിന് വോട്ട് ചെയ്യുമെന്നും കൊല്ലം സ്ഥാനാർത്ഥി കൂടിയായ എം. മുകേഷ് പറഞ്ഞു. കുഞ്ചാക്കോ ബോബൻ, സുരാജ് വെഞ്ഞാറമൂട്, ജഗദീഷ് തുടങ്ങിയവരും വോട്ട് രേഖപ്പെടുത്തി.

നടൻ കൃഷ്ണകുമാറിനൊപ്പം മക്കളായ അഹാന കൃഷ്ണയും ഇഷാനി കൃഷ്ണയും വോട്ട് ചെയ്യാനെത്തി. ജനങ്ങൾ ശരിയായ തീരുമാനമെടുക്കുമെന്നാണ് പ്രതീക്ഷയെന്ന് അഹാന പ്രതികരിച്ചു. താരങ്ങളുടെ സാന്നിധ്യം ബൂത്തുകളിൽ വലിയ ആവേശമാണ് വോട്ടർമാർക്കിടയിൽ ഉണ്ടാക്കിയത്.

### Related Links & Sources
- [Original Story Source](https://moviemax.in/news/352434/celebrities-cast-their-votes-while-standing-in-line)