(moviemax.in) ബോക്സ് ഓഫീസിൽ സമാനതകളില്ലാത്ത വിജയഗാഥ രചിച്ച് ആദിത്യ ധർ-രൺവീർ സിങ് ചിത്രം "ധുരന്ധർ പ്രതികാരം" കുതിപ്പ് തുടരുന്നു. ജിയോ സ്റ്റുഡിയോസും ബി62 സ്റ്റുഡിയോസും ചേർന്ന് നിർമ്മിച്ച ഈ ചിത്രം റിലീസ് ചെയ്ത് വെറും രണ്ടാഴ്ച പിന്നിടുമ്പോൾ ഇന്ത്യൻ സിനിമാ ചരിത്രത്തിലെ സകല റെക്കോർഡുകളും തകർത്തെറിഞ്ഞിരിക്കുകയാണ്.
ഇന്ത്യയിൽ നിന്ന് മാത്രം 1000 കോടി നെറ്റ് ഗ്രോസ് നേടുന്ന ആദ്യ ചിത്രം എന്ന അപൂർവ്വ നേട്ടത്തിന് തൊട്ടരികിലാണ് നിലവിൽ ഈ ചിത്രം. രണ്ടാഴ്ച കൊണ്ട് ഭാരതത്തിൽ നിന്ന് മാത്രം 961 കോടി രൂപയാണ് ചിത്രം അടിച്ചെടുത്തത്. മൂന്നാം വാരാന്ത്യം പൂർത്തിയാകുന്നതോടെ 1000 കോടി എന്ന മാന്ത്രിക സംഖ്യ ചിത്രം മറികടക്കുമെന്ന് ഉറപ്പായിക്കഴിഞ്ഞു.
ആഗോളതലത്തിലും ചിത്രത്തിന്റെ പ്രകടനം അമ്പരപ്പിക്കുന്നതാണ്. ഇതിനോടകം 1501 കോടി രൂപയുടെ ആഗോള ഗ്രോസ് കളക്ഷൻ സ്വന്തമാക്കിയ ചിത്രം അന്താരാഷ്ട്ര വിപണിയിൽ ഇന്ത്യൻ സിനിമയുടെ കരുത്ത് വിളിച്ചോതുന്നു.
ആദ്യ എട്ട് ദിവസങ്ങളിൽ 690 കോടി നേടിയ ചിത്രം രണ്ടാം വാരത്തിലും ആധിപത്യം നിലനിർത്തി. രണ്ടാം ആഴ്ചയിൽ മാത്രം 271 കോടിയാണ് ചിത്രം നേടിയത്. ഇതിൽ തിങ്കൾ മുതൽ വ്യാഴം വരെയുള്ള പ്രവൃത്തിദിവസങ്ങളിലും മികച്ച കളക്ഷൻ നിലനിർത്താൻ ചിത്രത്തിന് സാധിച്ചു. വിദേശ വിപണികളിൽ നിന്ന് മാത്രം 367 കോടി രൂപയാണ് രണ്ടാഴ്ച കൊണ്ട് ചിത്രം സമാഹരിച്ചത്.
ഏറ്റവും വലിയ ഹിന്ദി ഓപ്പണിങ്, വേഗത്തിൽ 900 കോടി ക്ലബ്ബിലെത്തിയ ഇന്ത്യൻ ചിത്രം, വടക്കേ അമേരിക്കയിൽ ഏറ്റവും കൂടുതൽ കളക്ഷൻ നേടിയ ഇന്ത്യൻ സിനിമ തുടങ്ങി നീണ്ട റെക്കോർഡുകളുടെ പട്ടികയാണ് "ധുരന്ധർ പ്രതികാരം" സ്വന്തമാക്കിയിരിക്കുന്നത്.
വെറും പത്ത് ദിവസം കൊണ്ട് ഈ പരമ്പരയിലെ ആദ്യ ഭാഗത്തിന്റെ വിദേശ കളക്ഷൻ മറികടന്ന ചിത്രം, ഇന്ത്യൻ സിനിമയുടെ ആഗോള മാനദണ്ഡങ്ങളെ തന്നെ മാറ്റിമറിച്ചിരിക്കുകയാണ്. മൂന്നാം വാരത്തിലും തീയറ്ററുകളിൽ വൻ തിരക്ക് അനുഭവപ്പെടുന്നതിനാൽ വരും ദിവസങ്ങളിലും കൂടുതൽ റെക്കോർഡുകൾ ചിത്രം തിരുത്തിക്കുറിക്കുമെന്നാണ് സിനിമാ ലോകത്തെ വിലയിരുത്തൽ.
Content Highlight: 'Dhurandhar 2' to cross Rs 1000 crore mark
