(moviemax.in) അമൽ നീരദ് സംവിധാനം ചെയ്യുന്ന ബിഗ് ബജറ്റ് ചിത്രം 'ബാച്ചിലർ പാർട്ടി D’EUX' വിലെ നായികയെക്കുറിച്ചുള്ള ഔദ്യോഗിക വിവരങ്ങൾ പുറത്തുവന്നതോടെ സിനിമാലോകം ആവേശത്തിലാണ്. യുവതാരം നസ്ലിന്റെ നായികയായി പ്രശസ്ത താരം ഹൻസിക കൃഷ്ണയാണ് ഈ ചിത്രത്തിലൂടെ മലയാള സിനിമയിലേക്ക് ചുവടുവയ്ക്കുന്നത്.
നടനും രാഷ്ട്രീയ നേതാവുമായ കൃഷ്ണകുമാറിന്റെ മക്കളിൽ നാലാമത്തെയാളായ ഹൻസിക, തന്റെ ഡിഗ്രി പഠനത്തോടൊപ്പമാണ് അഭിനയരംഗത്ത് സജീവമാകുന്നത്. ഇൻസ്റ്റാഗ്രാം റീലുകളിലൂടെയും മികച്ച ഫാഷൻ സെൻസിലൂടെയും സോഷ്യൽ മീഡിയയിൽ ലക്ഷക്കണക്കിന് ആരാധകരെ സ്വന്തമാക്കിയ ഹൻസികയ്ക്ക് ഇത് ആദ്യത്തെ മുഴുനീള വേഷമാണ്.
മുൻപ് അഹാന കൃഷ്ണ നായികയായ 'ലൂക്ക' എന്ന ചിത്രത്തിൽ അഹാനയുടെ കുട്ടിക്കാലം അവതരിപ്പിച്ചുകൊണ്ട് ഹൻസിക ശ്രദ്ധിക്കപ്പെട്ടിരുന്നു. അഹാനയ്ക്കും ഇഷാനിക്കും ശേഷം കൃഷ്ണകുമാർ കുടുംബത്തിൽ നിന്നും വെള്ളിത്തിരയിലെത്തുന്ന മൂന്നാമത്തെ മകളാണ് ഹൻസികയെന്ന പ്രത്യേകതയുമുണ്ട്.
2012-ൽ പുറത്തിറങ്ങിയ 'ബാച്ചിലർ പാർട്ടി'യുടെ രണ്ടാം ഭാഗമായി എത്തുന്ന ഈ ചിത്രത്തിൽ വമ്പൻ താരനിരയാണ് അണിനിരക്കുന്നത്. നസ്ലിനും ഹൻസികയ്ക്കും പുറമെ ടൊവിനോ തോമസ്, കുഞ്ചാക്കോ ബോബൻ, സൗബിൻ ഷാഹിർ, ഷറഫുദ്ദീൻ, ശ്രീനാഥ് ഭാസി തുടങ്ങിയവരും പ്രധാന വേഷങ്ങളിലെത്തുന്നു.
ഉണ്ണി ആറിന്റെ സംഭാഷണവും അപ്പു പ്രഭാകരന്റെ ഛായാഗ്രഹണവും ക്രിസ്റ്റോ സേവ്യറിന്റെ സംഗീതവും ചിത്രത്തിന് കരുത്തേകും. അമൽ നീരദ് പ്രൊഡക്ഷൻസ്, ഫഹദ് ഫാസിൽ പ്രൊഡക്ഷൻസ്, അൻവർ റഷീദ് എന്നിവർ ചേർന്നാണ് ഈ ചിത്രം നിർമിക്കുന്നത്.
Content Highlight: Hansika Krishna as the heroine of Nazlin
