(moviemax.in) കേരള നിയമസഭാ തിരഞ്ഞെടുപ്പ് ആവേശം കൊടുമുടി കയറുന്നതിനിടെ ശ്രദ്ധാകേന്ദ്രമായി മാറിയിരിക്കുകയാണ് സെലിബ്രിറ്റി സ്ഥാനാർത്ഥി അഖിൽ മാരാർ. തൃക്കാക്കര മണ്ഡലത്തിൽ ട്വന്റി 20 സ്ഥാനാർത്ഥിയായാണ് അഖിൽ ജനവിധി തേടുന്നത്. 'ഒരു താത്വിക അവലോകനം' എന്ന സിനിമയുടെ സംവിധായകനായും ബിഗ് ബോസ് മലയാളം സീസൺ 5 വിജയിയായും പ്രേക്ഷകർക്ക് പരിചിതനായ അഖിൽ, അടുത്തിടെ പുറത്തിറങ്ങിയ 'മുള്ളൻകൊല്ലി' എന്ന ചിത്രത്തിലൂടെ നായകനായും അരങ്ങേറിയിരുന്നു. തിരഞ്ഞെടുപ്പ് പ്രചാരണത്തിനിടെ നടൻ രമേഷ് പിഷാരടിക്കെതിരെ അഖിൽ നടത്തിയ പരാമർശങ്ങളും അതിന് ലഭിച്ച മറുപടികളും നിലവിൽ വലിയ തോതിൽ ചർച്ചയാകുന്നുണ്ട്.
ബിഗ് ബോസുമായി ബന്ധപ്പെട്ട് അഖിൽ മാരാർ പങ്കുവച്ചൊരു പോസ്റ്റിപ്പോൾ ശ്രദ്ധനേടിയിരിക്കുകയാണ്. ബിഗ് ബോസ് മലയാളം സീസൺ 5ന്റെ കപ്പ് അഖിൽ മാരാർക്ക് ഉള്ളതാണെന്ന് ജുനൈസിനോട് തർക്കിച്ച് പറയുന്ന അഖിലിന്റെ വീഡിയോയാണ് ഇത്. ഒപ്പം ഗ്രാന്റ് ഫിനാലേയിൽ മോഹൻലാൽ അഖിലാണ് വിജയി എന്ന് പ്രഖ്യാപിക്കുന്ന വീഡിയോയും പങ്കുവച്ചു. ഇതിനൊപ്പം, "ഇതേ ആത്മവിശ്വാസത്തോടെ ഞാൻ പറയും, തൃക്കാക്കര അഖിൽ മാരാർക്കുള്ളതാണ്. സത്യം തിരിച്ചറിഞ്ഞ പ്രേക്ഷകരാണ് അന്ന് ജയിപ്പിച്ചതെങ്കിൽ എനിക്കെതിരെ ഒരു വിഭാഗം പേര് സൃഷ്ടിക്കുന്ന വെറുപ്പ് കണ്ട ഈശ്വരൻ എനിക്കായി തൃക്കാക്കരയിൽ പ്രവർത്തിക്കും. തൃക്കാക്കര മാറും", എന്നായിരുന്നു അഖിൽ മാരാർ കുറിച്ച വാക്കുകൾ.
ബിഗ് ബോസ് കണ്ടവർ തനിക്ക് വോട്ട് ചെയ്യുമെന്ന തരത്തില് നേരത്തെ അഖിൽ മാരാർ പറഞ്ഞത് വൈറലായിരുന്നു. പിന്നാലെ ഇത്തവണ ഹോട്സ്റ്റാർ വഴിയാണോ വോട്ട് എന്ന തരത്തിലുള്ള ട്രോളുകളും വന്നു. ഇവയ്ക്ക് മറുപടി എന്നോണം, "വോട്ട് ഹോട്ട് സ്റ്റാർ വഴി ആയാലും പോളിംഗ് ബൂത്ത് വഴി വോട്ട് ചെയ്യുന്നത് ഒരുവന്റെ ഉള്ളിൽ മറ്റൊരുവനോട് തോന്നുന്ന ഇഷ്ടത്തിൽ നിന്നാണ്. ആ ഇഷ്ടം ആണ് വോട്ട് ചെയ്യുന്നതിനും മറ്റുള്ളവരെ കൊണ്ട് ഒരാൾക്ക് വോട്ട് ചെയ്യാൻ നിർബന്ധിക്കുന്നതിനും കാരണം. എനിക്ക് വോട്ട് ചെയ്യാനുള്ള കാരണം തൃക്കാക്കരയിലെ ജനത്തിനറിയാം. ഹോട്ട് സ്റ്ററിൽ വോട്ട് ചെയ്യണം എങ്കിൽ പണം മുടക്കി സബ്ക്രൈബ് ചെയ്യണം പോളിംഗ് ബൂത്തിൽ അത് വേണ്ട. അത് കൊണ്ട് വിഡ്ഢിത്തരം വിളമ്പുന്നവർ അറിയുക ഏത് പ്ലാറ്റ് ഫോം എന്നതല്ല എന്തിന് വോട്ട് നൽകുന്നു എന്ന കാരണത്തിനാണ് പ്രസക്തി", എന്നാണ് അഖിൽ മാരാർ കുറിച്ചിരിക്കുന്നത്.
'Bigg Boss Cup was mine, Thrikkakara will also be mine'; Akhil Marar confidently says
