(moviemax.in)കേരളത്തിന്റെ വികസന നേട്ടങ്ങളെയും സാമൂഹിക മാറ്റങ്ങളെയും അഭിനന്ദിച്ച് പ്രമുഖ നടി ഗൗരി കിഷൻ. ചെന്നൈയിൽ വളർന്ന താൻ കേരളത്തിലെ വികസന മാതൃകകളെ ഏറെ അത്ഭുതത്തോടെയാണ് നോക്കിക്കണ്ടതെന്ന് താരം പറഞ്ഞു. ഇൻഫർമേഷൻ ആൻഡ് പബ്ലിക് റിലേഷൻസ് വകുപ്പ് (PRD) തയ്യാറാക്കിയ ‘നാം മുന്നോട്ട്’ എന്ന പരിപാടിയിൽ സംസാരിക്കുകയായിരുന്നു ഗൗരി.
കേരളത്തിലെ ആരോഗ്യ മേഖല കൈവരിച്ച പുരോഗതിയെ നടി പ്രത്യേകം പ്രശംസിച്ചു. മറ്റു സ്ഥലങ്ങളിൽ പലപ്പോഴും ആശുപത്രി സന്ദർശനങ്ങൾ സങ്കീർണ്ണമായ അനുഭവമാകാറുണ്ട്. എന്നാൽ കേരളത്തിൽ സാധാരണക്കാർക്ക് പോലും യാതൊരു ബുദ്ധിമുട്ടും കൂടാതെ മികച്ച ചികിത്സാ സൗകര്യങ്ങൾ വളരെ എളുപ്പത്തിൽ ലഭ്യമാകുന്നുണ്ടെന്ന് താരം ചൂണ്ടിക്കാട്ടി.
താൻ ചെന്നൈയിലായിരുന്ന കാലം തൊട്ടേ കേരളത്തിലെ വികസന പ്രവർത്തനങ്ങൾ സസൂക്ഷ്മം നിരീക്ഷിക്കാറുണ്ടായിരുന്നു. മറ്റു പല രാജ്യങ്ങളിലും കാണാത്ത വിധത്തിലുള്ള വിപ്ലവകരമായ മാറ്റങ്ങൾ ഇവിടെ നടക്കുന്നുണ്ടെന്ന തിരിച്ചറിവാണ് തന്നെ കേരളത്തിലേക്ക് മാറി താമസിക്കാൻ പ്രേരിപ്പിച്ചതെന്നും താരം മനസ് തുറന്നു.
Kerala has developments that are not seen in other countries; Famous actress Gauri Kishan praises
