(https://moviemax.in/)രാജേഷ് മാധവൻ ആദ്യമായി സംവിധായകന്റെ തൊപ്പി അണിഞ്ഞ 'പെണ്ണും പൊറാട്ടും' ഈ മാസം 13-ന് നെറ്റ്ഫ്ലിക്സിലൂടെ ഒടിടി സ്ട്രീമിംഗ് ആരംഭിക്കുകയാണ്. തിയറ്ററുകളിൽ റിലീസ് ചെയ്യുന്നതിന് മുൻപേ തന്നെ പ്രമുഖ ഒടിടി പ്ലാറ്റ്ഫോമായ നെറ്റ്ഫ്ലിക്സ് ഡിജിറ്റൽ അവകാശം സ്വന്തമാക്കിയ അപൂർവ്വം മലയാള ചിത്രങ്ങളിൽ ഒന്നാണിത്.
ഐ.എഫ്.എഫ്.കെയിലും ഗോവ അന്താരാഷ്ട്ര ചലച്ചിത്ര മേളയിലും വലിയ കൈയടി നേടിയ ഈ ചിത്രം മലയാളത്തിന് പുറമെ തമിഴ്, തെലുങ്ക്, കന്നഡ, ഹിന്ദി എന്നീ ഭാഷകളിലും ലഭ്യമാകും. 'സുട്ടു' എന്ന നായ കേന്ദ്ര കഥാപാത്രമാകുന്ന ഈ ചിത്രത്തിൽ ആ നായയ്ക്ക് ശബ്ദം നൽകിയിരിക്കുന്നത് ടൊവിനോ തോമസാണ് എന്നത് ശ്രദ്ധേയമാണ്.
ഫാന്റസിയും സാമൂഹിക പരിഹാസവും ഒത്തുചേരുന്ന പ്രമേയത്തിൽ ഗ്രാമീണ പശ്ചാത്തലത്തിലുള്ള കഥയാണ് ചിത്രം പറയുന്നത്. ഭൂരിഭാഗം കഥാപാത്രങ്ങളെയും പുതുമുഖങ്ങൾ അവതരിപ്പിച്ചു എന്ന പ്രത്യേകതയുമുണ്ട്. സന്തോഷ് ടി. കുരുവിളയുടെ എസ്ടികെ ഫ്രെയിംസ് നിർമ്മിച്ച ഈ ചിത്രത്തിന്റെ തിരക്കഥ ഒരുക്കിയിരിക്കുന്നത് പ്രശസ്ത തിരക്കഥാകൃത്ത് രവിശങ്കറാണ്. സബിൻ ഉരളിക്കണ്ടി ഛായാഗ്രഹണവും ചമൻ ചാക്കോ എഡിറ്റിംഗും നിർവ്വഹിച്ച ചിത്രം, തിയറ്ററിൽ കാണാൻ സാധിക്കാത്തവർക്ക് ഒരു പുത്തൻ ദൃശ്യാനുഭവമായിരിക്കും സമ്മാനിക്കുക.
Content Highlight: 'Pennum Porattum' now available on OTT; streaming date announced
