(https://moviemax.in/) കേരളത്തിലെ പ്രശസ്തയായ വനിതാ ഡിജെകളിൽ ഒരാളായ ഡിജെ സനയ്ക്ക് (ഷഹന) നേരെ തൃശ്ശൂരിലെ പ്രകടനത്തിന് പിന്നാലെ അതിരൂക്ഷമായ സൈബർ ആക്രമണം. കൊച്ചി സ്വദേശിനിയായ സന, കേരളത്തിന് പുറത്തും വിദേശത്തും നിരവധി ഷോകൾ അവതരിപ്പിച്ച് ശ്രദ്ധേയയാണ്. പലപ്പോഴും വസ്ത്രധാരണത്തിന്റെ പേരിൽ വിമർശനങ്ങൾ നേരിട്ടിട്ടുണ്ടെങ്കിലും, കഴിഞ്ഞ ദിവസം തൃശ്ശൂരിൽ നടന്ന പരിപാടിക്ക് പിന്നാലെയാണ് മുൻപെങ്ങും ഇല്ലാത്ത വിധം സൈബർ ഇടങ്ങളിൽ താരം വേട്ടയാടപ്പെടുന്നത്.
വസ്ത്രധാരണത്തെ അധിക്ഷേപിക്കുന്നതിനൊപ്പം അതിക്രൂരമായ ബോഡി ഷെയ്മിങ്ങും താരത്തിന് നേരെ നടക്കുന്നുണ്ട്. സോഷ്യൽ മീഡിയയിൽ സനയുടെ വീഡിയോകൾക്ക് താഴെ വൻതോതിലുള്ള അധിക്ഷേപ കമന്റുകളാണ് ഉയരുന്നത്. എന്നാൽ ഇതിനോടകം തന്നെ നിരവധി പേർ താരത്തിന് പിന്തുണയുമായും രംഗത്തെത്തിയിട്ടുണ്ട്.
നിരവധി പേരാണ് റിയാക്ഷൻ വീഡിയോകളുമായി രംഗത്ത് എത്തിയത്. സ്ത്രീകൾ അടക്കമുള്ളവരാണ് സനയ്ക്ക് എതിരെ രംഗത്ത് എത്തിയത്. ഇപ്പോഴിതാ സൈബറാക്രമണത്തിൽ പ്രതികരണവുമായി എത്തിയിരിക്കുകയാണ് സന. ഒരു റിയാക്ഷൻ വീഡിയോയ്ക്ക് താഴെ കമന്റ് ചെയ്ത് കൊണ്ടാണ് സനയുടെ പ്രതികരണം. സബീൽ ബില്ലു എന്നയാളുടെ പോസ്റ്റിന് താഴെയാണ് കമന്റ്. 'സ്ത്രീകൾ ഈ വീഡിയോ കണ്ടിട്ട് അഭിപ്രായം പറയൂ', എന്നായിരുന്നു സബീലിന്റെ ക്യാപ്ഷൻ.
ഇത് വേദനയ്ക്കും അപ്പുറമായ കാര്യമാണെന്നും ബോഡി ഷെയ്മിങും പരിഹാസങ്ങളും ജീവഭയമുണ്ടാക്കുന്നതാണ് എന്നുമാണ് സന കുറിച്ചിരിക്കുന്നത്. "ഇത് കേവലം വേദന മാത്രമല്ല. അതിനും അപ്പുറമാണ്. ഇത് നിരന്തരമായ ഉപദ്രവവും ഭീഷണിപ്പെടുത്തലും ബോഡി ഷെയ്മിങ്ങുമാണ്. ഒരു സ്ത്രീയുടെ വസ്തുനിഷ്ഠതയും. ഇത്തരം പ്രവർത്തികൾ ഒരു വ്യക്തിയുടെ മാനസികാരോഗ്യത്തെ സാരമായി ബാധിക്കും. ഈ ലോകത്തോട് വിട പറയണമെന്ന ചിന്തകളിലേക്ക് അവരെ തള്ളിവിടുകയാണ് ചെയ്യുന്നത്. ഫലത്തിൽ, അത് സ്വയം ഉപദ്രവിക്കുന്നതിനോ ആത്മഹത്യ ചെയ്യുന്നതിനോ പ്രേരിപ്പിക്കുന്നത് തുല്യമാണ്", എന്നാണ് സന കമന്റിൽ കുറിച്ചിരിക്കുന്നത്. പിന്നാലെ പലരും പരിഹാസവുമായി എത്തിയെങ്കിലും ഇതൊന്നും കാര്യമാക്കേണ്ടെന്നും മുന്നോട്ട് പോകൂവെന്ന് പറഞ്ഞ് ആശ്വസിപ്പിക്കുന്നവരും ധാരാളമാണ്.
Content Highlight: Sana blasts body shaming
