---
title: "'മൈക്കിലൂടെ വിളിച്ചു പറഞ്ഞാൽ അത് തമാശയാകില്ല'; പാർഥിപന്റെ അധിക്ഷേപത്തിന് തൃഷയുടെ കുറിക്കുകൊള്ളുന്ന മറുപടി"
english_title: "Trisha's scathing response to Parthipan's insult"
publisher: "moviemax.in"
canonical_url: "https://moviemax.in/news/346557/trishas-scathing-response-to-parthipans-insult"
published_at: "2026-03-09T11:55:00+05:30"
category: "Kollywood"
language: "ml"
image: "https://cf.zdn.im/img/truevisionnews.com/0/image-uploads/69ae683db26c9_Trishas_scathing_response_to_Parthipans_insult.jpg"
keywords: []
---

# 'മൈക്കിലൂടെ വിളിച്ചു പറഞ്ഞാൽ അത് തമാശയാകില്ല'; പാർഥിപന്റെ അധിക്ഷേപത്തിന് തൃഷയുടെ കുറിക്കുകൊള്ളുന്ന മറുപടി

> **Lead Summary:** തമിഴ് സിനിമാ ലോകത്തെ അവാർഡ് വേദിയിൽ നടി തൃഷയെ അധിക്ഷേപിക്കുന്ന തരത്തിൽ നടൻ പാർഥിപൻ നടത്തിയ പരാമർശം വലിയ വിവാദമായിരുന്നു. ഇപ്പോഴിതാ ഈ സംഭവത്തിൽ തന്റെ പ്രതികരണം അറിയിച്ചിരിക്കുകയാണ് തൃഷ. സോഷ്യൽ മീഡിയ പ്ലാറ്റ്‌ഫോമായ എക്സിലൂടെയാണ് താരം തന്റെ നിലപാട് വ്യക്തമാക്കിയത്.

## Article Content

തമിഴ് സിനിമാ ലോകത്തെ അവാർഡ് വേദിയിൽ നടി തൃഷയെ അധിക്ഷേപിക്കുന്ന തരത്തിൽ നടൻ പാർഥിപൻ നടത്തിയ പരാമർശം വലിയ വിവാദമായിരുന്നു. ഇപ്പോഴിതാ ഈ സംഭവത്തിൽ തന്റെ പ്രതികരണം അറിയിച്ചിരിക്കുകയാണ് തൃഷ. സോഷ്യൽ മീഡിയ പ്ലാറ്റ്‌ഫോമായ എക്സിലൂടെയാണ് താരം തന്റെ നിലപാട് വ്യക്തമാക്കിയത്.

പാർഥിപന്റെയോ അദ്ദേഹം സംസാരിച്ച വേദിയുടെയോ പേര് തൃഷ നേരിട്ട് പരാമർശിച്ചിട്ടില്ല. എങ്കിലും, സംഭവത്തെക്കുറിച്ച് അറിവുള്ളവർക്ക് കൃത്യമായി മനസ്സിലാക്കാവുന്ന രീതിയിലായിരുന്നു താരത്തിന്റെ പോസ്റ്റ്. ഗലാട്ട അവാർഡ്‌സ് 2026 വേദിയിലായിരുന്നു വിവാദത്തിനാസ്പദമായ പാർഥിപന്റെ പരാമർശം ഉണ്ടായത്. തൃഷയെ അപഹസിക്കുന്ന തരത്തിലുള്ള നടന്റെ വാക്കുകൾക്കെതിരെ സോഷ്യൽ മീഡിയയിൽ വലിയ പ്രതിഷേധം ഉയരുന്നതിനിടെയാണ് താരത്തിന്റെ ഈ പരോക്ഷ പ്രതികരണം എത്തിയിരിക്കുന്നത്.

> വേദിയിൽ സംസാരിക്കവെ അവതാരകർ ഓരോ താരങ്ങളെക്കുറിച്ചും അവരുടെ കഥാപാത്രങ്ങളെക്കുറിച്ചുമുള്ള പാർഥിപന്‍റെ അഭിപ്രായം ചോദിക്കുകയായിരുന്നു. അതിനിടെയാണ് പൊന്നിയിൻ സെൽവനിലെ തൃഷയുടെ കഥാപാത്രമായ കുന്ദവൈയെക്കുറിച്ചുള്ള ചോദ്യം വന്നത്. ഒപ്പം പിന്നിലെ സ്ക്രീനിൽ തൃഷയുടെ ചിത്രവും തെളിഞ്ഞു. ഇതിന് പാർഥിപൻ നൽകിയ മറുപടിയാണ് വിവാദമായത്. “കുന്ദവൈയോട് വീടിനുള്ളിൽ ഇരിക്കാൻ ആവശ്യപ്പെടുന്നതായിരിക്കും നല്ലത്. അവർ വീടിന് വെളിയിൽ ഇറങ്ങിയില്ലെങ്കിൽ നല്ലത്. അത് (വീടിന് വെളിയിൽ ഇറങ്ങുന്നത്) ഒരുപാട് പ്രശ്നങ്ങൾ സൃഷ്ടിക്കുന്നുണ്ട്”, എന്നായിരുന്നു പാർഥിപന്‍റെ വാക്കുകൾ. നിർമ്മാതാവ് കൽപ്പാത്തി എസ് സുരേഷിൻ്റെ മകൻ്റെ വിവാഹ സൽക്കാരത്തിൽ പങ്കെടുക്കാൻ ഈയിടെ വിജയ്‍യും തൃഷയും ഒരുമിച്ച് എത്തിയിരുന്നു. ഇക്കാര്യം സൂചിപ്പിച്ചായിരുന്നു പാർഥിപന്‍റെ വാക്കുകൾ എന്നായിരുന്നു വിമർശനം. ഒരു നടിയുമായി ബന്ധമുണ്ടെന്നതടക്കമുള്ള ആരോപണങ്ങളുമായി ഭാര്യ സംഗീത വിജയ്‍ക്കെതിരെ വിവാഹ മോചന ഹർജി ഫയൽ ചെയ്തതിന് പിന്നാലെ ആയിരുന്നു വിജയ്‍യും തൃഷയും ഒരുമിച്ച് വിവാഹ റിസപ്ഷനിൽ എത്തിയത്. സംഗീത ഹർജിയിൽ പറയുന്ന നടി തൃഷയാണെന്നും വ്യാപക പ്രചരണമുണ്ട്.

> പാർഥിപന്‍റെ പരാമർശത്തോടുള്ള തൃഷയുടെ പ്രതികരണം ഇങ്ങനെ- “തന്‍റെ സഹായി വഴി ഒരു വ്യക്തി ആവശ്യപ്പെട്ടത് പ്രകാരമാണ് അടുത്തിടെ നടന്ന ഒരു പരിപാടിയിൽ എന്‍റെ പേരും ചിത്രവും ഉൾപ്പെടുത്തിയതെന്ന് അതിന്‍റെ സംഘാടകർ എന്നോട് പറഞ്ഞു. മൈക്കിലൂടെ സംസാരിച്ചു എന്നതുകൊണ്ട് ഒരു പരാമർശം ബുദ്ധിപൂർവ്വമുള്ളതോ രസകരമോ ആവുന്നില്ല. പകരം മണ്ടത്തരം ഉച്ചത്തിൽ ആക്കുകയേ അത് ചെയ്യുന്നുള്ളൂ. അസംസ്കൃതമായ വാക്കുകൾ ആരെയാണോ ലക്ഷ്യമാക്കുന്നത് എന്നതിനേക്കാൾ അത് പറയുന്ന ആളിനെക്കുറിച്ച് തന്നെയാണ് കൂടുതൽ വ്യക്തമാക്കുന്നത്”, എന്നാണ് എക്സിൽ തൃഷയുടെ പോസ്റ്റ്. എക്സില്‍ 18,000 ല്‍ അധികം ലൈക്കുകളാണ് പോസ്റ്റിന് ലഭിച്ചിരിക്കുന്നത്.

### Related Links & Sources
- [Original Story Source](https://moviemax.in/news/346557/trishas-scathing-response-to-parthipans-insult)