(moviemax.in) സിനിമാ ലോകം ഒന്നടങ്കം കാത്തിരുന്ന 'വിരോഷ്' വിവാഹത്തിന്റെ ആവേശം അടങ്ങുന്നതിന് മുൻപേ, സോഷ്യൽ മീഡിയയെ ഇളക്കിമറിച്ചുകൊണ്ട് താരദമ്പതികളുടെ സംഗീത് ചിത്രങ്ങൾ പുറത്തുവന്നു.
ഉദയ്പൂരിലെ കൊട്ടാര സ്മരണകൾ ഉണർത്തുന്ന വേദിയിൽ വെച്ച് നടന്ന ആഘോഷങ്ങളുടെ വർണ്ണാഭമായ കാഴ്ചകളാണ് വിജയ് ദേവരകൊണ്ടയും രശ്മിക മന്ദാനയും ഇപ്പോൾ പങ്കുവെച്ചിരിക്കുന്നത്.
ഫാഷൻ ലോകത്തെ മാന്ത്രികരായ ഫാൽഗുനി ഷെയ്ൻ പീക്കോക്ക് ഡിസൈൻ ചെയ്ത വസ്ത്രങ്ങളിലാണ് ഇരുവരും സംഗീത് രാത്രിയിൽ തിളങ്ങിയത്. സിൽവർ ലഹങ്കയിൽ അതീവ സുന്ദരിയായ രശ്മികയ്ക്കൊപ്പം റോയൽ ബ്ലൂ ഷെർവാണിയിൽ വിജയ് കൂടി ചേർന്നപ്പോൾ ആരാധകർക്ക് അതൊരു കണ്കുളിർക്കുന്ന കാഴ്ചയായി.
വസ്ത്രത്തിനൊപ്പമുള്ള പ്രത്യേക കേപ്പുകളും വിജയ്യുടെ എമറാൾഡ് നെക്ലേസും ലുക്കിന് ഒരു രാജകീയ പ്രൗഢി പകർന്നു."കാലുകൾ വേദനിക്കുന്നത് വരെ ഞങ്ങൾ നൃത്തം ചെയ്തു" എന്നാണ് ആഘോഷങ്ങളെക്കുറിച്ച് വിജയ് കുറിച്ചത്.
പുലർച്ചെ 4 മണി വരെ നീണ്ടുനിന്ന ചടങ്ങിൽ ചിരിച്ചും കളിച്ചും നൃത്തം ചെയ്തും തങ്ങൾ ആറാടുകയായിരുന്നുവെന്ന് താരം വെളിപ്പെടുത്തി. തങ്ങളെ അമ്പരപ്പിച്ചത് കുടുംബാംഗങ്ങളുടെ തകർപ്പൻ പ്രകടനങ്ങളായിരുന്നുവെന്ന് രശ്മികയും കൂട്ടിച്ചേർത്തു.
ആനന്ദ് ദേവരകൊണ്ടയും രശ്മികയുടെ സഹോദരി ഷിമാനും ഉൾപ്പെടെയുള്ള കുടുംബാംഗങ്ങൾ ഒന്നിച്ചുള്ള 'ഫാമിലി ജാം' ചിത്രങ്ങളും ഇക്കൂട്ടത്തിലുണ്ട്. ഫെബ്രുവരി 26-ന് നടന്ന വിവാഹത്തിന് ശേഷം ഇനി എല്ലാവരും ഉറ്റുനോക്കുന്നത് മാർച്ച് 4-ന് ഹൈദരാബാദിൽ വെച്ച് നടക്കുന്ന ഗംഭീര വിവാഹ റിസപ്ഷനിലേക്കാണ്.
സിനിമയിലെ സഹപ്രവർത്തകർക്കും സുഹൃത്തുക്കൾക്കുമായി നടത്തുന്ന ഈ വിരുന്നിലും വമ്പൻ സർപ്രൈസുകൾ ഉണ്ടാകുമെന്നാണ് റിപ്പോർട്ടുകൾ.
Content Highlight: Virosh Sangeet Night pictures are making waves
