(https://moviemax.in/) കലാമണ്ഡലം സത്യഭാമയുടെ അധിക്ഷേപ പരാമർശങ്ങൾക്കെതിരെ ശക്തമായ പ്രതികരണവുമായി ബിഗ് ബോസ് മുൻ താരം നന്ദന നന്ദു. നന്ദനയുടെ ശാരീരിക പ്രത്യേകതകളെ പരിഹസിച്ചുകൊണ്ട് സത്യഭാമ നടത്തിയ പരാമർശങ്ങൾ സോഷ്യൽ മീഡിയയിൽ വലിയ ചർച്ചയായതിന് പിന്നാലെയാണ് നന്ദനയുടെ മറുപടി വീഡിയോ എത്തിയത്.
നേരത്തെ സത്യഭാമ നടത്തിയ ചില വർണ്ണവിവേചന പരാമർശങ്ങൾക്കെതിരെ നന്ദന പ്രതികരിച്ചിരുന്നു. ഇതിന് മറുപടി നൽകുന്നതിനിടയിലാണ് സത്യഭാമ നന്ദനയെ വ്യക്തിപരമായി അധിക്ഷേപിച്ചത്. നന്ദനയുടെ മുഖം കണ്ടാൽ ലോറി കയറിയിറങ്ങിയതു പോലിരിക്കുമെന്നും മറ്റുമായിരുന്നു സത്യഭാമയുടെ വാക്കുകൾ. എന്നാൽ ഇത്തരം ബോഡി ഷെയ്മിങ്ങുകൾ തന്നെ തളർത്തില്ലെന്നും, അന്തസ്സോടെയാണ് താൻ ജീവിക്കുന്നതെന്നും നന്ദന പുതിയ ഫെയ്സ്ബുക്ക് വീഡിയോയിലൂടെ വ്യക്തമാക്കി. ലോറി കയറി ഇറങ്ങിയ മുഖമാണെങ്കിലും എനിക്ക് എന്റെ മുഖം ഇഷ്ടമാണെന്നും താരം മറുപടി നൽകി.
''യാതൊരു പരിചയവും ഇല്ലാത്ത ഒരു വ്യക്തിയെ എടീ, പോടീ എന്നു വിളിക്കാനും ജാതിയുടെയും മതത്തിന്റെയും നിറത്തിന്റെയും അടിസ്ഥാനത്തിൽ പരസ്യമായി അപമാനിക്കുന്ന, ഉള്ളിൽ കാളകൂട വിഷം നിറച്ച് എല്ലാ വീഡിയോകളിലും തുപ്പുന്ന നിങ്ങളെ ഞാൻ ഏതായാലും ഇനി ടീച്ചറേ എന്ന് വിളിക്കാൻ പോകുന്നില്ല. ടീച്ചറേ എന്ന് വിളിക്കാനുള്ള യാതൊരു യോഗ്യതയും നിങ്ങൾക്കില്ല. അതുകൊണ്ട് ഞാൻ നിങ്ങളെ വിളിക്കുന്നത് വെപ്പുമുടി സത്യഭാമേ എന്നാണ്. അതായിരിക്കും നിങ്ങൾക്ക് കുറച്ചുകൂടി ചേരുന്ന പേര്. പ്രായത്തിനെ ബഹുമാനിക്കണം എന്നത് ശരിയാണ്. പക്ഷേ, മനുഷ്യർക്ക് പ്രായമാകുമ്പോളല്ലേ ബഹുമാനിക്കേണ്ട ആവശ്യം ഉള്ളൂ. കഴുതകൾക്ക് പ്രായമാകുമ്പോൾ ബഹുമാനിക്കാറില്ലല്ലോ. കഴുതകൾ കഴുതകൾ തന്നെയാണ്.
എനിക്കറിയാവുന്ന കലാമണ്ഡലത്തിലെ ടീച്ചർമാരൊക്കെ നല്ല സംസ്കാരമുള്ള ടീച്ചർമാരാണ്. ഇതേതു കലാമണ്ഡലം ആണ്. വ്യാജഡോക്ടർ, വ്യാജവക്കീൽ എന്നൊക്കെ കേട്ടിട്ടുണ്ട്. വ്യാജകലാമണ്ഡലത്തെ കാണുന്നത് ആദ്യമായിട്ടാണ്. ആളുകളെ അധിക്ഷേപിക്കാതെ ഈ അറുപത്തെട്ടാം വയസിൽ ജീവിക്കാൻ പറ്റില്ലേ? പോയി രാമായണം വായിച്ചിരിക്ക്. നിങ്ങളെപ്പോലെ സോഫയും വലിച്ചുനീട്ടിയിരുന്ന് പൊട്ടും തൊട്ട്, സാരിയുടുത്ത്, കണ്ണെഴുതി, ലിപ്സ്റ്റിക്കിട്ട് കണകുണാ വർത്തമാനം പറയാൻ എനിക്ക് സമയമില്ല. നിങ്ങൾക്കാ സമയം ഉള്ളതുകൊണ്ടാണല്ലോ എല്ലാവരെയും കുറിച്ച് കുറ്റം പറയുന്നത്. നിങ്ങൾ ഇനിയും എന്നെക്കുറിച്ച് വീഡിയോ ചെയ്തോളൂ. ഒരു കുഴപ്പവുമില്ല. വീട്ടിൽ അരി മേടിക്കണമെങ്കിൽ എനിക്ക് ജോലിക്കു പോണം, ഇതുപോലെ ഇരുന്നു സംസാരിക്കാൻ സമയമില്ല'', നന്ദന വീഡിയോയിൽ പറഞ്ഞു.
Content Highlight: Nandana gave a detailed reply to Satyabhama's insults
