പ്രതിസന്ധി ഘട്ടത്തിലൂടെ കടന്നുപോവുന്നതിനിടയിലായിരുന്നു ദിലീപിന്റെ രാമലീല റിലീസ് ചെയ്തത്. ബോക്സോഫീസില് നിന്നും മികച്ച വിജയമായിരുന്നു ഈ സിനിമ സ്വന്തമാക്കിയത്. മലയാളത്തിലെ മികച്ച പൊളിറ്റിക്കല് ത്രില്ലറുകളിലൊന്നായാണ് ഈ ചിത്രത്തെ ആരാധകര് വിശേഷിപ്പിച്ചത്. 14 കോടി മുതല് മുടക്കിലായിരുന്നു ചിത്രമൊരുക്കിയത്.
രാമനുണ്ണിയായാണ് ദിലീപ് എത്തിയത്. അപ്രതീക്ഷിത ട്വിസ്റ്റുകളും പ്രവചനാതീതമായ ക്ലൈമാക്സുമായിരുന്നു ചിത്രത്തിന്റെ പ്രത്യേകത. രാമലീലയുമായി ദിലീപ് എത്തിയ അതേ ദിവസം തന്നെയാണ് മഞ്ജു വാര്യര് സുജതയായി എത്തിയത്. ഒരേ ദിവസമായിരുന്നു ഈ രണ്ട് ചിത്രങ്ങളും റിലീസ് ചെയ്തത്. ഈ ചിത്രങ്ങള് റിലീസ് ചെയ്തിട്ട് 4 വര്ഷമായിരിക്കുകയാണ്.
ദിലീപിനും മഞ്ജു വാര്യര്ക്കും നിര്ണ്ണായകമായ ദിനമായിരുന്നു 2017 സെപ്റ്റംബര് 28. രാമനുണ്ണിയുമായി നീണ്ട ഇടവേളയ്ക്ക് ശേഷമായി ദിലീപ് തിരിച്ചെത്തിയത് ഈ ദിവസമായിരുന്നു. സുജാതയെന്ന സാധാരണക്കാരിയായുള്ള മഞ്ജു വാര്യരുടെ വരവും ഇതേ ദിവസമായിരുന്നു. തുടക്കം മുതലേ തന്നെ വാര്ത്തകളില് ഇടം നേടിയ സിനിമകളായിരുന്നു രണ്ടും. നവാഗതനായ ഫാന്റെ പ്രവീണായിരുന്നു ഉദാഹരണം സുജാത സംവിധാനം ചെയ്തത്. അരുണ് ഗോപി സംവിധാനം ചെയ്ത ആദ്യ സിനിമയായിരുന്നു രാമലീല. 2 നവാഗത സംവിധായകര് കൂടിയാണ് ഈ ചിത്രങ്ങളിലൂടെ തുടക്കം കുറിച്ചത്.
പരസ്പരമുള്ള പഴിചാരലുകളില്ലാതെ വഴിപിരിഞ്ഞവരാണ് ദിലീപും മഞ്ജു വാര്യരും. ബോക്സോഫീസില് ഇരുവരും ഏറ്റുമുട്ടുന്നുവെന്നത് വലിയ ചര്ച്ചയായിരുന്നു. ബഹിഷ്ക്കരണ ഭീഷണികളും തിയേറ്റര് അടച്ചുപൂട്ടലുമൊക്കെ ഉയര്ന്നെങ്കിലും അവയെ അവഗണിച്ചായിരുന്നു രാമലീല റിലീസ് ചെയ്തത്. രാമലീലയ്ക്കൊപ്പമായി ഉദാഹരണം സുജാത റിലീസ് ചെയ്യുന്നതില് അതൃപ്തി രേഖപ്പെടുത്തി ആരാധകരെത്തിയിരുന്നു. പരോക്ഷമായി ദിലീപിനെ മഞ്ജു പിന്തുണയ്ക്കുന്നുവെന്ന വിമര്ശനങ്ങളും അന്ന് ഉയര്ന്നിരുന്നു.
നല്ല സിനിമയെ സ്വീകരിക്കുന്ന പ്രേക്ഷകര് ഈ ചിത്രവും ഏറ്റെടുക്കും. വര്ഷങ്ങളായി മനസ്സില് കൊണ്ടുനടന്നിരുന്ന സ്വപ്നമാണ് രാമലീലയിലൂട പൂവണിയുന്നത്. അത് പ്രേക്ഷകര്ക്ക് മനസ്സിലാവുമെന്നായിരുന്നു അരുണ് ഗോപി പറഞ്ഞത്. സംവിധായകന്റെ വാക്കുകളെ ദിലീപ് ആരാധകര് അന്വര്ത്ഥമാക്കുകയായിരുന്നു. ബഹിഷ്ക്കരണ ഭീഷണിയൊന്നും സിനിമയെ ബാധിച്ചിരുന്നില്ല. മികച്ച വിജയം നേടി മുന്നേറുകയായിരുന്നു ചിത്രം, രാമനുണ്ണി ദിലീപിന്റെ കരിയര് ബ്രേക്കായി മാറുകയായിരുന്നു.
രാമനുണ്ണിയെ മാത്രമല്ല സുജാതയേയും പ്രേക്ഷകര് ഏറ്റെടുത്തിരുന്നു. വീട്ടുജോലി ചെയ്ത് മകളെ വളര്ത്തുന്ന സുജാതയായുള്ള മഞ്ജുവിന്രെ ഭാവപ്പകര്ച്ചയ്ക്ക് കൈയ്യടിയുമായാണ് ആരാധകരെത്തിയത്. പതിവില് നിന്നും വ്യത്യസ്തമായ കഥാപാത്രത്തെ താരം അങ്ങേയറ്റം മനോഹരമായാണ് അവതരിപ്പിച്ചത്. അനശ്വര രാജനായിരുന്നു മകളായി അഭിനയിച്ചത്. മംമ്ത മോഹന്ദാസും ചിത്രത്തില് പ്രധാന കഥാപാത്രമായെത്തിയിരുന്നു.
Content Highlight: The day Manju Warrier and Dileep came together and applauded; it was the fourth year that even the critics applauded.
