(https://moviemax.in/) 'കേരള സ്റ്റോറി' രണ്ടാം ഭാഗത്തിനെതിരെ ശക്തമായ നിലപാടെടുത്ത മുഖ്യമന്ത്രി പിണറായി വിജയനെ പ്രശംസിച്ച് യൂട്യൂബർ തൊപ്പി (നിഹാദ്). കഴിഞ്ഞ ദിവസം പുറത്തിറക്കിയ റീൽസിലൂടെയാണ് തൊപ്പി മുഖ്യമന്ത്രിയെ വാനോളം പുകഴ്ത്തിയത്. സംഘ്പരിവാറിനെ പേരെടുത്ത് വിമർശിക്കാൻ ആർജ്ജവം കാണിച്ച പിണറായി വിജയന്റെ നടപടിയെ 'മാസ്' എന്നാണ് തൊപ്പി വിശേഷിപ്പിച്ചത്.
"ഇതാണ് സിഎം എന്നും, ഒരു മുഖ്യമന്ത്രി എന്നാൽ ഇങ്ങനെയായിരിക്കണം" എന്നും തന്റെ സ്വഭാവശൈലിയിൽ തൊപ്പി വീഡിയോയിൽ പറയുന്നു. സംഘ്പരിവാർ അജണ്ടകളെ തുറന്നുകാട്ടുന്ന മുഖ്യമന്ത്രിയുടെ വാക്കുകൾ കൃത്യമായ രാഷ്ട്രീയ നിലപാടാണെന്നും വീഡിയോയിൽ വ്യക്തമാക്കുന്നുണ്ട്. നിമിഷങ്ങൾക്കുള്ളിൽ വൈറലായ റീൽസ് ഇതിനോടകം ലക്ഷക്കണക്കിന് ആളുകളാണ് കണ്ടത്.
കഴിഞ്ഞ ദിവസമാണ് വിവാദ ചിത്രം കേരള സ്റ്റോറിയുടെ രണ്ടാം ഭാഗമായ 'ദ കേരള സ്റ്റോറി 2' നെതിരെ മുഖ്യമന്ത്രി പിണറായി വിജയൻ രംഗത്തെത്തിയത്. കേരളത്തിനെതിരെ വിദ്വേഷം വിതയ്ക്കാനും സംസ്ഥാനത്തിന്റെ മതനിരപേക്ഷ പാരമ്പര്യത്തെ അവഹേളിക്കാനും ലക്ഷ്യമിട്ടുള്ള ശ്രമമാണിതെന്ന് മുഖ്യമന്ത്രി ആരോപിച്ചു.
സിനിമയുടെ ഒന്നാം ഭാഗം കേരളവിരുദ്ധ പ്രചാരണങ്ങളും വിദ്വേഷവും നിറച്ച വർഗീയ അജണ്ടയോടെയായിരുന്നു നിർമ്മിച്ചതെന്ന് ഈ നാട് തിരിച്ചറിഞ്ഞതാണെന്നും മുഖ്യമന്ത്രി പ്രസ്താവനയിൽ പറഞ്ഞു. കലാസൃഷ്ടിയുടെ മേലങ്കി അണിഞ്ഞ് പുറത്തിറക്കിയ ആ ചിത്രത്തെ സമൂഹം ‘ദ റിയൽ കേരള സ്റ്റോറി’ വിളിച്ചുപറഞ്ഞുകൊണ്ട് തള്ളിക്കളഞ്ഞതായും അദ്ദേഹം കൂട്ടിച്ചേർത്തു.
'ബീഫ്' എന്ന പേരിട്ടത് കൊണ്ട് ചലച്ചിത്ര മേളയിലെ `ഒരു ചിത്രത്തിന് പ്രദർശനാനുമതി പോലും നിഷേധിച്ച കാലത്ത്, സമൂഹത്തിൽ ഭിന്നതയും വിദ്വേഷവും പടർത്തുക എന്ന ലക്ഷ്യത്തോടെ നിർമ്മിക്കുന്ന വിഷസൃഷ്ടികൾക്ക് എങ്ങനെ പ്രദർശനാനുമതി ലഭിക്കുന്നതെന്നും മുഖ്യമന്ത്രി ചോദിക്കുന്നു.
Reaction to Kerala Story Part 2, YouTuber thoppi Chief Minister PinarayiVijayan
