മലയാള സിനിമ-സീരിയൽ രംഗത്ത് തന്റേതായ ഇടം കണ്ടെത്തിയ നടി മഞ്ജു പത്രോസ് പങ്കുവെച്ച ജന്മദിന കുറിപ്പ് സോഷ്യൽ മീഡിയയിൽ ശ്രദ്ധ നേടുന്നു. ജനപ്രിയ പരമ്പരയായ 'അളിയൻസിൽ' തന്റെ നാത്തൂൻ കഥാപാത്രത്തെ അവതരിപ്പിക്കുന്ന നടി സൗമ്യ ഭാഗ്യനാഥനാണ് മഞ്ജു ഹൃദ്യമായ ഭാഷയിൽ ആശംസകൾ നേർന്നത്. സ്ക്രീനിലെ നാത്തൂൻ പോരിനപ്പുറം ജീവിതത്തിൽ ഇരുവരും തമ്മിലുള്ള ആഴത്തിലുള്ള സൗഹൃദമാണ് ഈ കുറിപ്പിലൂടെ പ്രകടമാകുന്നത്.
'വെറുതെയല്ല ഭാര്യ' എന്ന റിയാലിറ്റി ഷോയിലൂടെ മലയാളി പ്രേക്ഷകരുടെ പ്രിയങ്കരിയായി മാറിയ മഞ്ജു പത്രോസ്, നിലവിൽ കൗമുദി ടിവിയിലെ 'അളിയൻസ്' എന്ന ഹിറ്റ് പരമ്പരയിലെ പ്രധാന വേഷത്തിലാണ് എത്തുന്നത്. അനീഷ് രവി, റിയാസ് നർമകല തുടങ്ങിയവർക്കൊപ്പം സൗമ്യ ഭാഗ്യനാഥനും പ്രധാന വേഷം ചെയ്യുന്ന ഈ പരമ്പരയ്ക്ക് വലിയ ആരാധക പിന്തുണയുണ്ട്. പരമ്പരയിലെ താരങ്ങളെല്ലാം കുടുംബാംഗങ്ങളെപ്പോലെയാണെന്ന് വ്യക്തമാക്കുന്നതാണ് മഞ്ജുവിന്റെ പുതിയ പോസ്റ്റ്.
''ഈശ്വരൻ ചില മനുഷ്യരെ നമുക്ക് അരികിൽ എത്തിക്കും. അവർക്ക് ചില നിയോഗങ്ങൾ ഉണ്ടാകും. അങ്ങനെ എന്റെ അടുത്ത് ഈശ്വരനായിട്ട് അയച്ചതാണ് ഇവളെ...
ഒരുപാട് ചിരിച്ചും കരഞ്ഞും സങ്കടങ്ങൾ പങ്കിട്ടും ഞങ്ങൾ കൂട്ടുകൂടാൻ തുടങ്ങിയിട്ട് കാലങ്ങൾ കഴിഞ്ഞു. ജീവിക്കാൻ പേടിക്കേണ്ട എന്ന് കാണിച്ചു തന്നത് ഒരു പരിധി വരെ ഇവളാണ്. ചേച്ചി വണ്ടി വാങ്ങണം എന്ന് ആദ്യം പറഞ്ഞത് ഇവളാണ്. അങ്ങനെ ജീവിതത്തിൽ പലഘട്ടങ്ങളിലും മുന്നോട്ടു പ്രേരിപ്പിച്ചത് ഇവളാണ്.
ജീവിതത്തിൽ നിന്നും ഒരിക്കലും പൊഴിഞ്ഞു പോകരുതെന്ന് മനസിൽ ആഗ്രഹിക്കുന്ന ബന്ധങ്ങളിൽ ഒന്നാണ് ഇത്. എന്റെ സിങ്കപ്പെണ്ണിന് എല്ലാ നന്മകളും ജീവിതത്തിൽ ഉണ്ടാകട്ടെ'', എന്നാണ് സൗമ്യ ഭാഗ്യനാഥനൊപ്പമുള്ള ചിത്രം പോസ്റ്റ് ചെയ്ച് മഞ്ജു ഇൻസ്റ്റഗ്രാമിൽ കുറിച്ചത്. മഞ്ജു പത്രോസിന്റെ പോസ്റ്റിനു താഴെ നിരവധിപ്പേർ സൗമ്യ ഭാഗ്യനാഥന് ജന്മദിനാശംസകൾ നേർന്ന് കമന്റ് ചെയ്യുന്നുണ്ട്.
'It was a relationship I never wanted to end... but...'; Manju Patrose opens up about her beloved
