(moviemax.in) കഴിഞ്ഞ വർഷത്തെ മെഗാ ഹിറ്റുകളിൽ ഒന്നായ രൺവീർ സിംഗ് ചിത്രം 'ധുരന്ദറി'ലെ 'ഷെറാറത്ത്' എന്ന ഗാനത്തിന്റെ ചിത്രീകരണ അനുഭവങ്ങൾ പങ്കുവെച്ച് നടി അയേഷ ഖാൻ. തന്റെ ആർത്തവ ദിനങ്ങളിലായിരുന്നു ഈ പാട്ടിന്റെ ഷൂട്ടിംഗ് നടന്നതെന്ന് താരം വെളിപ്പെടുത്തി. ശശ്വന്ത് സച്ച്ദേവിന്റെ സംഗീതത്തിൽ മധുബന്തി ബാഗ്ച്ചിയും ജാസ്മിൻ സാൻഡ്ലാസും ചേർന്ന് പാടിയ ഈ ഗാനം സോഷ്യൽ മീഡിയയിൽ വലിയ തരംഗമായിരുന്നു.
ആർത്തവത്തിന്റെ പ്രയാസങ്ങൾക്കിടയിലും കഠിനമായ നൃത്തച്ചുവടുകൾ ചെയ്യേണ്ടി വന്നു. തുടർച്ചയായ നൃത്തം കാരണം അസ്ഥികൾ വരെ വേദനിക്കുന്ന അവസ്ഥയുണ്ടായെന്നും ആ ദിവസങ്ങളിൽ ഒരുപാട് ബുദ്ധിമുട്ടിയാണ് ചിത്രീകരണം പൂർത്തിയാക്കിയതെന്നും അയേഷ പറഞ്ഞു. 1300 കോടിയിലധികം ആഗോള കളക്ഷൻ നേടിയ ആദിത്യ ധർ ചിത്രം തിയേറ്ററുകൾക്ക് പിന്നാലെ ഒടിടിയിലും മികച്ച പ്രതികരണമാണ് നേടുന്നത്.
"രണ്ടുദിവസമായിരുന്നു ഷൂട്ടിങ്. നല്ല പണിയുണ്ടായിരുന്നു. എന്റെ ആർത്തവദിനങ്ങളിലായിരുന്നു ഷൂട്ടിങ്. എന്റെ ഏറ്റവും മികച്ച അവസ്ഥയിലായിരുന്നില്ല ഞാൻ. വീർത്തിരിക്കുന്നതുകാരണം ഒട്ടും മികച്ചതായി എനിക്ക് തോന്നിയില്ല. കുറച്ചുകൂടെ നന്നായിരുന്നുവെങ്കിലെന്ന് എനിക്ക് തോന്നി. രണ്ടുദിവസത്തിനുള്ളിൽ തീർക്കാൻ ഒരുപാട് കാര്യങ്ങളുണ്ടായിരുന്നു." അയേഷ ഖാൻ പറയുന്നു.
"സെറ്റിൽ എന്താണ് സംഭവിക്കുന്നതെന്നും ആരൊക്കെയുണ്ടായിരുന്നുവെന്നുപോലും ഞങ്ങൾക്ക് അറിയില്ലായിരുന്നു. എനിക്കും ക്രിസ്റ്റലിനും എവിടേയും നോക്കാൻ പോലും സമയമുണ്ടായിരുന്നില്ല. ഈ രണ്ടുദിവസത്തിനുള്ളിൽ തന്നെ ആ വിവാഹരംഗങ്ങളും ഷൂട്ട് ചെയ്യേണ്ടിയിരുന്നു. ചെയ്യാൻ കുറേകാര്യങ്ങൾ ഉണ്ടായിരുന്നെങ്കിലും എനിക്കൊട്ടും സമയമുണ്ടായിരുന്നില്ല. ഞങ്ങൾ വല്ലാതെ ക്ഷീണിതരായിരുന്നു. ഒരുപാട് ഡാൻസ് ചെയ്ത് ഞങ്ങൾക്ക് അസ്ഥികൾ വേദനിക്കാൻ തുടങ്ങി." അയേഷ ഖാൻ കൂട്ടിച്ചേർത്തു. പിങ്ക് വില്ലയ്ക്ക് നൽകിയ അഭിമുഖത്തിലായിരുന്നു അയേഷ ഖാന്റെ പ്രതികരണം.
Content Highlight: Ayesha Khan reveals the pain behind the song 'Sherarat'
