(moviemax.in) നിവിൻ പോളിയെ നായകനാക്കി അരുൺ വർമ്മ സംവിധാനം ചെയ്ത 'ബേബി ഗേൾ' തിയറ്ററുകൾക്ക് പിന്നാലെ ഒടിടി റിലീസിന് ഒരുങ്ങുന്നു. ജനുവരി 23-ന് വലിയ പ്രതീക്ഷകളോടെ എത്തിയ ചിത്രം ബോക്സ് ഓഫീസിൽ പരാജയപ്പെട്ടതിനെത്തുടർന്നാണ് റിലീസ് ചെയ്ത് 21-ാം ദിനം ഡിജിറ്റൽ പ്ലാറ്റ്ഫോമിലേക്ക് എത്തുന്നത്.
ഫെബ്രുവരി 12 മുതൽ പ്രമുഖ ഒടിടി പ്ലാറ്റ്ഫോമായ സോണി ലിവിലൂടെ ചിത്രം സ്ട്രീമിംഗ് ആരംഭിക്കും. പ്രമുഖ ട്രേഡിംഗ് അനലിസ്റ്റുകളുടെ കണക്കുകൾ പ്രകാരം, തിയറ്ററുകളിൽ നിന്ന് രണ്ട് ആഴ്ച കൊണ്ട് ഏകദേശം 4.55 കോടി രൂപ മാത്രമാണ് ചിത്രത്തിന് നേടാനായത്.
'ഗരുഡൻ' എന്ന ഹിറ്റ് ചിത്രത്തിന് ശേഷം അരുൺ വർമ്മ സംവിധാനം ചെയ്ത ഈ ചിത്രത്തിന്റെ രചന നിർവ്വഹിച്ചിരിക്കുന്നത് പ്രശസ്ത തിരക്കഥാകൃത്തുക്കളായ ബോബി-സഞ്ജയ് ആണ്. ലിജോ മോൾ നായികയായെത്തിയ ചിത്രത്തിൽ സംഗീത് പ്രതാപ്, അഭിമന്യു തിലകൻ എന്നിവർക്കൊപ്പം നാല് ദിവസം പ്രായമുള്ള കുഞ്ഞും പ്രധാന കഥാപാത്രത്തെ അവതരിപ്പിക്കുന്നു എന്നത് ഈ സിനിമയുടെ ഒരു സവിശേഷതയാണ്.
അസീസ് നെടുമങ്ങാട്, ജാഫർ ഇടുക്കി, മേജർ രവി, അതിഥി രവി തുടങ്ങി വലിയൊരു താരനിര തന്നെ അണിനിരന്ന ഈ ചിത്രം മാജിക് ഫ്രെയിംസിന്റെ ബാനറിലാണ് പുറത്തിറങ്ങിയത്. സാം സി.എസ് സംഗീതവും ഫയസ് സിദ്ദിഖ് ഛായാഗ്രഹണവും നിർവ്വഹിച്ച ചിത്രം തിരുവനന്തപുരം, കൊച്ചി എന്നിവിടങ്ങളിലായാണ് ചിത്രീകരിച്ചത്.
തിയറ്ററിൽ നിരാശപ്പെടുത്തിയെങ്കിലും ഒടിടിയിൽ ചിത്രം മികച്ച പ്രേക്ഷക പ്രതികരണം നേടുമെന്ന പ്രതീക്ഷയിലാണ് അണിയറപ്രവർത്തകർ.
Content Highlight: 'Baby Girl' enters third week on digital platforms after release
