തമിഴിലെ സ്റ്റൈല് മന്നനായ രജനികാന്തിന്റെ മൂത്തമകള് ഐശ്വര്യ രജനികാന്തും നടന് ധനുഷും തമ്മിലുള്ള വിവാഹമോചനം എല്ലാവരെയും ഞെട്ടിച്ചിരിക്കുകയാണ്. താരദമ്പതിമാര്ക്കിടയില് പ്രശ്നങ്ങള് ഉണ്ടായിരുന്നോ എന്നതിനെ കുറിച്ച് കൂടുതല് വിവരങ്ങളൊന്നും പുറത്ത് വരുന്നതിന് മുന്പ് തന്നെ ഔദ്യോഗികമായി വിവാഹമോചനക്കാര്യം പ്രഖ്യാപിച്ചു.
ഇരുകുടുംബങ്ങളും ചേര്ന്ന് ഒരു മധ്യസ്ഥത വെച്ചാല് തീരുന്ന പ്രശ്നമേ ദമ്പതിമാര്ക്കിടയിലുള്ളു എന്നൊക്കെ ആരാധകര് പറഞ്ഞിരുന്നു. മാത്രമല്ല വിവാഹമോചനം പ്രഖ്യാപിച്ചതിന് പിന്നാലെ ഹൈദരബാദിലെ ഒരു ഹോട്ടലില് തന്നെ ധനുഷും ഐശ്വര്യയും ഉണ്ടായിരുന്നെന്ന വാര്ത്തയും വ്യാപകമായി പ്രചരിച്ചു.
പക്ഷേ ഒരു ഹോട്ടലില് ഉണ്ടായിരുന്നെങ്കിലും പരസ്പരം സംസാരിക്കാന് ഇരുവരും ശ്രമിച്ചില്ലെന്നാണ് അറിയുന്നത്. ഇത്രയും കാലം നന്നായി ജീവിക്കാന് സാധിച്ചവര്ക്ക് ഇനിയും മുന്നോട്ട് പോവാന് പറ്റുമെന്ന് തന്നെ എല്ലാവരും കരുതിയെങ്കിലും കാര്യങ്ങളുടെ സത്യാവസ്ഥ അങ്ങനെയല്ലെന്നാണ് വ്യക്തമാവുന്നത്.
വിവാഹമോചനത്തെ കുറിച്ച് പ്രഖ്യാപിക്കുമ്പോള് പോലും ഐശ്വര്യയുടെ സോഷ്യല് മീഡിയ പേജുകളില് ഭര്ത്താവിന്റെ പേരും ഉണ്ടായിരുന്നു. 'ഐശ്വര്യ ആര് ധനുഷ്' എന്നാണ് ഇന്സ്റ്റാഗ്രാമിലും ട്വിറ്ററിലുമൊക്കെ താരപുത്രി പേര് കൊടുത്തിരുന്നത്.
ഇത്രയും നാളുകളായിട്ടും അതിനൊരു മാറ്റമില്ലെങ്കിലും ഐശ്വര്യയിപ്പോള് ട്വിറ്ററിൽ നിന്നും മാറ്റിയിരിക്കുകയാണ്. ധനുഷ് എന്ന പേര് ഒഴിവാക്കിയതിന് പകരം ഐശ്വര്യ രജനികാന്ത് എന്ന പേരിലേക്ക് എത്തിയിരിക്കുകയാണ്. അതേ സമയം ഇൻസ്റ്റാഗ്രാമിൽ ധനുഷിൻ്റെ പേര് ഉണ്ടെന്നതും ശ്രദ്ധേയമാണ്.
ധനുഷുമായി ഉണ്ടായിരുന്ന സകല ബന്ധങ്ങളും ഇതിലൂടെ അവസാനിക്കുകയാണോ എന്ന ചോദ്യവും ഉയര്ന്ന് വരുന്നുണ്ട്. പക്ഷേ വളരെ പക്വതയോടെയാണ് താരങ്ങള് ഇതൊക്കെ കൈകാര്യം ചെയ്തിരിക്കുന്നത്. വിവാഹമോചനത്തിന് മുന്പും ശേഷവും പരസ്പരം പഴി ചാരുകയോ മോശമായി അഭിപ്രായ പ്രകടനം നടത്തുകയോ ചെയ്തിട്ടില്ല.
മാത്രമല്ല ഇത് തികച്ചും പേഴ്സണല് കാര്യമായി കുടുംബത്തിനകത്ത് മാത്രമായി കൊണ്ട് പോവുകയാണ്. ഒരു സമയത്ത് മക്കളുടെ കാര്യങ്ങള് നോക്കാന് അച്ഛനോ അമ്മയോ ആരെങ്കിലും ഒരാള് ഉണ്ടാവുമെന്നും ഇരുവരും തീരുമാനച്ചിരുന്നു. ഇതോടെ മക്കളുടെ കാര്യത്തിലെ ആശങ്കയും മാറി.
Content Highlight: Ex-wife Aishwarya ends all relationship with Dhanush
