ബോളിവുഡ് സൂപ്പർ താരം അക്ഷയ് കുമാറിൻ്റെ അമ്മ അരുണ ഭാട്ടിയ അന്തരിച്ചു. ഇന്ന് പുലർച്ചെയായിരുന്നു അന്ത്യം. അക്ഷയ് കുമാർ തന്നെയാണ് ഈ വിവരം പുറത്ത് വിട്ടത്. സോഷ്യൽ മീഡിയയിലൂടെ താരം തൻ്റെ ആരാധകരെയും മാധ്യമങ്ങളെയും ജീവിതത്തിലെ പ്രിയപ്പെട്ട അമ്മയുടെ വിയോഗം അറിയിക്കുകയായിരുന്നു. ഇത് സഹിക്കാൻ പറ്റാവുന്നതിലും അപ്പുറമുള്ള വേദനയാണെന്നാണ് താരം ഈ വാർത്ത പങ്കുവെച്ചു കൊണ്ട് കുറിച്ചത്. താരം സോഷ്യൽ മീഡിയയിൽ കുറിച്ചതിങ്ങനെ.........
'അവൾ എന്റെ കാതലായിരുന്നു. എന്റെ അസ്തിത്വത്തിന്റെ കാതലായ ഭാഗത്ത് ഇന്ന് എനിക്ക് അസഹനീയമായ വേദന അനുഭവപ്പെടുകയാണ്. എന്റെ അമ്മ ശ്രീമതി അരുണ ഭാട്ടിയ ഇന്ന് രാവിലെ ഈ ലോകത്തോട് വിട പറഞ്ഞു, മറ്റേതെങ്കിലും ലോകത്ത് എന്റെ അച്ഛനുമായി വീണ്ടും ഒന്നിച്ചു. ഞാനും എന്റെ കുടുംബവും ഈ അവസ്ഥയിലൂടെ കടന്നുപോകുമ്പോൾ നിങ്ങളുടെ പ്രാർത്ഥനകളെ ഞാൻ മാനിക്കുന്നു. ഓം ശാന്തി.'
കഴിഞ്ഞ തിങ്കളാഴ്ച, ലണ്ടനിലായിരുന്ന അക്ഷയ് കുമാർ മുംബൈയിലേക്ക് മടങ്ങിയിരുന്നു, തന്റെ അമ്മ അരുണ ഭാട്ടിയയുടെ അന്ത്യസമയത്ത് പ്രിയപ്പെട്ട അമ്മയ്ക്കൊപ്പമായിരുന്നു താരം. രഞ്ജിത് തിവാരിക്കൊപ്പം ‘സിൻഡ്രെല്ല’ എന്ന സിനിമയുടെ ചിത്രീകരണത്തിനിടെയാണ് താരം തിരികെ മുംബൈയ്ക്ക് പോകാൻ തീരുമാനിച്ചത്. ഒരു വാർത്താ പോർട്ടൽ റിപ്പോർട്ട് ചെയ്യുന്നത് പ്രകാരം അക്ഷയ് കുമാറിന്റെ അമ്മയ്ക്ക് സുഖമില്ലാതെ കഴിയുകയായിരുന്നു, മുംബൈയിലെ ആശുപത്രിയിൽ ഐസിയുവിൽ പ്രവേശിപ്പിച്ചിരിക്കുകയായിരുന്നു.
പിന്നീട്, താരം തന്റെ അമ്മയെക്കുറിച്ചുള്ള വിവരം സോഷ്യൽ മീഡിയയിൽ പങ്കുവെക്കുകയും ചെയ്തിരുന്നു. ഏറെ വികാരഭരിതമായ കുറിപ്പിൽ അവൾക്കായി പ്രാർത്ഥിക്കാൻ താരം ആരാധകരോട് അഭ്യർത്ഥിക്കുകയും ചെയ്തിരുന്നു. അദ്ദേഹം എഴുതി, "എന്റെ അമ്മയുടെ ആരോഗ്യത്തെക്കുറിച്ചുള്ള നിങ്ങളുടെ ഉത്കണ്ഠ വല്ലാതെ സ്പർശിച്ചു. അത് വാക്കുകളിൽ ഒതുക്കാനാവില്ല. എനിക്കും എന്റെ കുടുംബത്തിനും ഇത് വളരെ ബുദ്ധിമുട്ടുള്ള സമയമാണെന്നും നിങ്ങളുടെ ഓരോ പ്രാർത്ഥനയും വളരെയധികം സഹായിക്കുമെന്നും താരം കുറിച്ചിരുന്നു.
അതേസമയം, സോഷ്യൽ മീഡിയയിൽ അദ്ദേഹത്തിന്റെ അമ്മയുടെ വിയോഗത്തെ കുറിച്ച് സിനിമാരംഗത്തെ ആരാധകരും സുഹൃത്തുക്കളും സഹതാരങ്ങളും അനുശോചനം അറിയിക്കുന്നുമുണ്ട്. നിമ്രത് കൗർ ട്വീറ്റ് ചെയ്തത് ഇങ്ങനെയാണ്, "നിങ്ങളുടെ അഗാധമായ നഷ്ടത്തിൽ വല്ലാത്ത വിഷമമുണ്ട്. ആദരാഞ്ജലികൾ നേരുന്നു. ഈ ഖേദകരമായ വേളയിൽ നിങ്ങൾക്കും മുഴുവൻ കുടുംബത്തിനും അഗാധമായ അനുശോചനവും എന്റെ ഹൃദയം നിറഞ്ഞ പ്രാർത്ഥനയും. സാത്നാം വഹേ ഗുരു". നിമ്രത് കുറിച്ചു.
Content Highlight: My mother was at my heart — it's a pain beyond endurance
