മലയാളത്തിൽ പുതുമയായ അബ്സെർഡ് ഹ്യൂമർ രീതിയിലൊരുക്കുന്ന സിനിമയെന്ന രീതിയിൽ ശ്രദ്ധ നേടിയ ചിത്രമാണ് കനകം കാമിനി കലഹം. ചിത്രത്തിൻ്റെ പ്രഖ്യാപന വേളയിൽ തന്നെ ഏറെ ശ്രദ്ധ നേടിയിരുന്നു. വേറിട്ട പേരു തന്നെയാണ് ചിത്രം ശ്രദ്ധ നേടാനുള്ള കാരണവും. നിവിൻ പോളിയും ഗ്രേസ് ആൻ്റണിയും വിനയ് ഫോർട്ടും ഒന്നിക്കുന്ന ചിത്രത്തിൻ്റെ ടീസറും ഏറെ ശ്രദ്ധിക്കപ്പെട്ടിരുന്നു. മലയാളത്തിൽ സമീപകാലത്തൊന്നും ആരും പരീക്ഷിച്ചിട്ടില്ലാത്ത അബ്സെർഡ് ഹ്യൂമറാണ് (Absurd Humour) ചിത്രം കൈകാര്യം ചെയ്യുന്നതെന്ന് ടീസർ പറയാതെ പറഞ്ഞിരുന്നു.
വിദേശ ഓപറ വേദിയെ അനുസ്മരിപ്പിക്കുന്ന സെറ്റപ്പിൽ ഒരു നിശ്ചലദൃശ്യം പോലെ പ്രത്യക്ഷപ്പെടുന്ന കഥാപാത്രങ്ങളോടെയായിരുന്നു ചിത്രത്തിൻ്റെ ടീസർ ഒരുക്കിയിരുന്നത്. നിവിൻ പോളിയും ഗ്രേസ് ആന്റണിയും ഈജിപ്ഷ്യൻ രാജാവിന്റെയും രാജ്ഞിയുടെയും വേഷവിധാനത്തിലായിരുന്നു ടീസറിൽ പ്രത്യക്ഷപ്പെട്ടത്. ഇപ്പോഴിതാ ചിത്രത്തിൻ്റെ റിലീസ് സംബന്ധിച്ച പുതിയ വിവരങ്ങൾ പുറത്ത് വരികയാണ്. ചിത്രം ഓടിടി റിലീസിന് തയ്യാറെടുക്കുകയാണെന്നാണ് റിപ്പോർട്ടുകൾ സൂചിപ്പിക്കുന്നത്. രതീഷ് പൊതുവാൾ തന്നെയാണ് ഇക്കാര്യം വ്യക്തമാക്കിയത്. ഇംഗ്ലീഷ് ഓൺലൈൻ മാധ്യമമായ ഓടിടി പ്ലേയിലൂടെയാണ് ഈ വിവരം സംവിധായകൻ പുറത്ത് വിട്ടിരിക്കുന്നത്.
സുരാജ് വെഞ്ഞാറമൂടും സൗബിൻ ഷാഹിറും തകര്ത്തഭിനയിച്ച 'ആൻഡ്രോയ്ഡ് കുഞ്ഞപ്പൻ വേർഷൻ 5.25' ഒരുക്കിയ രതീഷ് ബാലകൃഷ്ണന് പൊതുവാൾ ഒരുക്കുന്ന പുതിയ സിനിമയാണ് കനകം കാമിനി കലഹം. 'ചിത്രത്തിന് സെൻസർ ബോർഡ് യു സർട്ടിഫിക്കേറ്റാണ് നൽകിയിരിക്കുന്നത്. ഈ മാസം തന്നെ ചിത്രം പ്രേക്ഷകരിലേക്കെത്തിയേക്കും. ആദ്യം തീയേറ്റർ റിലീസായിരുന്നു ചിത്രം പ്ലാൻ ചെയ്തിരുന്നത്. ഇതൊരു കോമഡി സിനിമയാണ്. പക്ഷേ ഒരു ഓണലൈൻ പ്ലാറ്റ്ഫോമിൽ ഈ കോമഡി എങ്ങനെ എത്ര നന്നായി വർക്കൌട്ടാകുമെന്ന് അറിയില്ല. അതറിയാനുള്ള കാത്തിരിപ്പിലാണ്. തീയേറ്ററുകൾ തുറക്കുന്നത് സംബന്ധിച്ച തീരുമാനം എടുക്കുന്നത് സംബന്ധിച്ചുള്ള നീക്കുപോക്കുകൾ അനന്തമായി നീളുന്നതിനാലാണ് ഞങ്ങൾ ഓടിടി റിലീസ് തീരുമാനിച്ചത്. പക്ഷേ ഏത് പ്ലാറ്റ്ഫോം വഴി റിലീസ് ചെയ്യുമെന്നത് സംബന്ധിച്ച അന്തിമ തീരുമാനമായിട്ടില്ല.' സംവിധായകൻ പറയുന്നു.
നിവിന് തന്റെ 36-ാം പിറന്നാള് ദിനത്തിലായിരുന്നു ഈ ചിത്രം പ്രഖ്യാപിച്ച് ടൈറ്റിൽ പോസ്റ്റര് പുറത്തുവിട്ടിരുന്നത്. നിവിന്റെ നിര്മ്മാണ കമ്പനിയായ പോളി ജൂനിയര് പിക്ചേര്സ് നിര്മ്മിക്കുന്ന ചിത്രം കൂടിയാണിത്. ജോയ് മാത്യു, വിൻസി അലോഷ്യസ്, ജാഫർ ഇടുക്കി, ശിവദാസ് കണ്ണൂർ തുടങ്ങി നിരവധി താരങ്ങളാണ് സിനിമയിൽ അഭിനയിക്കുന്നത്. മുടി നീട്ടി വളർത്തിയാണ് നിവിൻ ഷൂട്ടിംഗിനെത്തിയത്. വേറിട്ട ലുക്കിലാണ് വിനയ് ഫോർട്ടും എത്തിയിരുന്നത്. നാടൻ ലുക്കിലാണ് ഗ്രേസും ചിത്രത്തിൽ അഭിനയിക്കുന്നതെന്നാണ് ലഭിക്കുന്ന വിവരം.
Content Highlight: 'Kanakam Kamini Kalaham' for ODT release
