---
title: "'ലക്ഷ്യ' തുടങ്ങാന്‍ ധൈര്യം തന്നത് ചേട്ടന്‍; ലക്ഷ്യയെക്കുറിച്ച് അന്ന് കാവ്യ മാധവന്‍ പറഞ്ഞത്"
english_title: "Interviews given by Kavya Madhavan at the start of the lakshya are going viral again."
publisher: "moviemax.in"
canonical_url: "https://moviemax.in/news/30852/interviews-given-by-kavya-madhavan-at-the-start-of-the-lakshya-are-going-viral-again"
published_at: "2022-03-10T12:13:00+05:30"
category: "Malayalam"
language: "ml"
image: "https://cf.zdn.im/img/truevisionnews.com/0/image-uploads/62299e6436134_lakshya.jpg"
keywords: []
---

# 'ലക്ഷ്യ' തുടങ്ങാന്‍ ധൈര്യം തന്നത് ചേട്ടന്‍; ലക്ഷ്യയെക്കുറിച്ച് അന്ന് കാവ്യ മാധവന്‍ പറഞ്ഞത്

> **Lead Summary:** കാവ്യ മാധവന്റെ ഉടമസ്ഥതയിലായി തുടങ്ങിയ ബോട്ടീക്കാണ് ലക്ഷ്യ. അഭിനയവുമായി മുന്നേറുന്നതിനിടയില്‍ തന്നെ ബിസിനസിലേക്ക് തിരിയുകയായിരുന്നു കാവ്യ മാധവന്‍. വിജയകരമായി മുന്നേറുന്നതിനിടയിലായിരുന്നു ചില അപ്രതീക്ഷിത സംഭവങ്ങള്‍ അരങ്ങേറിയതും ലക്ഷ്യ വാര്‍ത്തകളില്‍ നിറഞ്ഞതും.

## Article Content

കാവ്യ മാധവന്റെ ഉടമസ്ഥതയിലായി തുടങ്ങിയ ബോട്ടീക്കാണ് ലക്ഷ്യ. അഭിനയവുമായി മുന്നേറുന്നതിനിടയില്‍ തന്നെ ബിസിനസിലേക്ക് തിരിയുകയായിരുന്നു കാവ്യ മാധവന്‍. വിജയകരമായി മുന്നേറുന്നതിനിടയിലായിരുന്നു ചില അപ്രതീക്ഷിത സംഭവങ്ങള്‍ അരങ്ങേറിയതും ലക്ഷ്യ വാര്‍ത്തകളില്‍ നിറഞ്ഞതും.

നടിയെ ആക്രമിച്ച ദൃശ്യങ്ങളടങ്ങിയ പെന്‍ഡ്രൈവുമായി പള്‍സര്‍ സുനി ലക്ഷ്യയില്‍ എത്തിയിരുന്നു എന്നറിഞ്ഞതിന് പിന്നാലെയായാണ് അന്വേഷണ സംഘം ലക്ഷ്യയിലെത്തിയതും സിസിടിവി ദൃശ്യങ്ങള്‍ പരിശോധിച്ചതും.

ബുധനാഴ്ച പുലര്‍ച്ചയായി ഇടപ്പള്ളിയിലെ ലക്ഷ്യ ബോട്ടീക്കിന് തീപിടിച്ചുവെന്നും തുണിത്തരങ്ങളും തയ്യല്‍ മെഷീനുകളും കത്തിനശിച്ചുവെന്നുമുള്ള വിവരങ്ങളായിരുന്നു പുറത്തുവന്നത്. ലക്ഷ്യ തുടങ്ങുന്ന സമയത്ത് കാവ്യ മാധവന്‍ നല്‍കിയ അഭിമുഖങ്ങള്‍ വീണ്ടും വൈറലായിക്കൊണ്ടിരിക്കുകയാണ്.

പത്രസമ്മേളനത്തിലൂടെയായാണ് കാവ്യ മാധവന്‍ ലക്ഷ്യ തുടങ്ങുന്നതിന്റെ സന്തോഷം പങ്കിട്ടത്. സഹോദരനായ മിഥുന്‍ മാധവനും ഭാര്യ റിയയും കാവ്യയ്‌ക്കൊപ്പമുണ്ടായിരുന്നു. ഇതാദ്യമായാണ് എനിക്ക് വേണ്ടി ഒരു പത്രസമ്മേളനം വിളിച്ചത്. പലപ്പോഴും പത്രസമ്മേളനത്തിന്റെ ഭാഗമായിട്ടുണ്ടെങ്കിലും ഇതാദ്യത്തെ അനുഭവമാണ്.

സിനിമയ്‌ക്കൊപ്പമായി മറ്റെന്തെങ്കിലും ചെയ്യണമെന്നാഗ്രഹിച്ചിരുന്നു. അങ്ങനെയാണ് ലക്ഷ്യയിലേക്ക് എത്തിയതെന്നും താരം പറഞ്ഞിരുന്നു.

സുപ്രിയ ടെക്‌സ്റ്റൈല്‍സ് എന്ന കടയുണ്ടായിരുന്നു കാവ്യയുടെ അച്ഛന്. നാളുകള്‍ നീണ്ട ആലോചനയ്ക്ക് ശേഷമായാണ് വസ്ത്രവ്യാപാര രംഗത്തേക്കിറങ്ങാന്‍ തീരുമാനിച്ചത്.

ഫാഷന്‍ ഡിസൈനറായ ചേട്ടനാണ് ഒരു ഓണ്‍ലൈന്‍ സംരംഭം തുടങ്ങിക്കൂടേയെന്ന് ആദ്യമായി ചോദിച്ചത്. തുടക്കത്തില്‍ പേടിയായിരുന്നുവെങ്കിലും പിന്നീട് ഇതും ഈസിയായി മാറിയെന്നും കാവ്യ വ്യക്തമാക്കിയിരുന്നു.

സിംപിളായൊരു പേരായിരിക്കണം എന്നുണ്ടായിരുന്നു. ഒരു അര്‍ത്ഥം ഉണ്ടാവണം, ഒരു പോസിറ്റിവിറ്റി ഉണ്ടാവണം എന്നും ആഗ്രഹിച്ചിരുന്നു. കുടുംബവും സിനിമയും പോലെ തന്നെയാണ് തനിക്ക് ബിസിനസും. എല്ലാ കാര്യത്തിലും പിന്തുണയ്ക്കാറുണ്ട് കുടുംബം. ട്രന്‍ഡിന്റെ പുറകെ പോവണമെന്നുള്ളത് കൊണ്ട് ഇതൊരു ബാധ്യതയാവുമോയെന്നായിരുന്നു ആശങ്ക.

സിനിമയിലായാലും പൊതുപരിപാടികളില്‍ പങ്കെടുക്കുമ്പോഴായാലും കാവ്യയും കുടുംബവും അണിയുന്നത് ലക്ഷ്യയില്‍ ഡിസൈന്‍ ചെയ്ത വസ്ത്രങ്ങളാണ്. മക്കളായ മീനാക്ഷിക്കും മഹാലക്ഷ്മിക്കും വേണ്ടിയും ലക്ഷ്യയില്‍ വസ്ത്രങ്ങള്‍ ഡിസൈന്‍ ചെയ്യാറുണ്ട്.

ഓണപ്പൂക്കളത്തിന് അരികില്‍ ഇരിക്കുന്ന മീനാക്ഷിയുടേയും മഹാലക്ഷമിയുടേയും ചിത്രം മാത്രമല്ല വസ്ത്രങ്ങളും ചര്‍ച്ചയായിരുന്നു. ലക്ഷ്യയിലായിരുന്നു അത് ഡിസൈന്‍ ചെയ്തതെന്നുള്ള വിവരങ്ങളും പുറത്തുവന്നിരുന്നു.

### Related Links & Sources
- [Original Story Source](https://moviemax.in/news/30852/interviews-given-by-kavya-madhavan-at-the-start-of-the-lakshya-are-going-viral-again)