---
title: "'നായാട്ട്' ഇതര ഭാഷകളിലേക്ക്, തമിഴൊരുക്കാൻ ഗൗതം മേനോൻ; ഹിന്ദിയിലും തെലുങ്കിലും റീമേയ്ക്ക് ഒരുങ്ങുന്നു"
english_title: "Gautham Menon to prepare Tamil for non-hunting languages; The remake is being prepared in Hindi and Telugu"
publisher: "moviemax.in"
canonical_url: "https://moviemax.in/news/3007/gautham-menon-to-prepare-tamil-for-non-hunting-languages-the-remake-is-being-prepared-in-hindi-and-telugu"
published_at: "2021-10-04T21:49:00+05:30"
category: "Malayalam"
language: "ml"
image: "https://cf.zdn.im/img/truevisionnews.com/0/image-uploads/61060be7e762c_Untitled-1.jpg"
keywords: []
---

# 'നായാട്ട്' ഇതര ഭാഷകളിലേക്ക്, തമിഴൊരുക്കാൻ ഗൗതം മേനോൻ; ഹിന്ദിയിലും തെലുങ്കിലും റീമേയ്ക്ക് ഒരുങ്ങുന്നു

> **Lead Summary:** കുഞ്ചാക്കോ ബോബൻ, നിമിഷ ജോർജ്, ജോജു ജോർജ് എന്നിവരെ കേന്ദ്ര കഥാപാത്രങ്ങളാക്കി മാർട്ടിൻ പ്രക്കാട്ട് സംവിധാനം ചെയ്ത ചിത്രമാണ് നായാട്ട്. മികച്ച പ്രേക്ഷക, നിരൂപക പ്രശംസയാണ് ചിത്രത്തിന് ലഭിച്ചത്.

## Article Content

കുഞ്ചാക്കോ ബോബൻ, നിമിഷ ജോർജ്, ജോജു ജോർജ് എന്നിവരെ കേന്ദ്ര കഥാപാത്രങ്ങളാക്കി മാർട്ടിൻ പ്രക്കാട്ട് സംവിധാനം ചെയ്ത ചിത്രമാണ് നായാട്ട്. മികച്ച പ്രേക്ഷക, നിരൂപക പ്രശംസയാണ് ചിത്രത്തിന് ലഭിച്ചത്.

ഇപ്പോഴിതാ നായാട്ടിന് റീമേക്കുകൾ ഒരുങ്ങുകയാണ്. തമിഴ്, ഹിന്ദി, തെലുങ്ക് ഭാഷകളിലാണ് ചിത്രത്തിന് റീമേക്ക് ഒരുങ്ങുന്നത്. തമിഴിൽ ചിത്രം സംവിധാനം ചെയ്യുന്നത് ​ഗൗതം വാസുദേവ് മേനോനാണ്.

റീമേക്കുമായി ബന്ധപ്പെട്ട മറ്റ് വിവരങ്ങൾ ഒന്നും തന്നെ പുറത്തുവന്നിട്ടില്ല. തീയേറ്ററുകളിൽ മികച്ച പ്രതികരണം നേടിയ നായാട്ട്, കൊവിഡ് പ്രതിസന്ധിയെ തുടർന്ന് പിന്നീട് നെറ്റ്ഫ്ലിക്സിലും പ്രദർശനത്തിനെത്തിയിരുന്നു.

ജോജുവിന്റെ കഥാപാത്രത്തിന് മികച്ച അഭിപ്രായമാണ് നേടിയത്. കുഞ്ചാക്കോ ബോബന്റെ അഭിനയ ജീവിതത്തിലെ തന്നെ ഏറ്റവും മികച്ച കഥാപാത്രങ്ങളിൽ ഒന്നാണ് പ്രവീൺ മൈക്കിൾ എന്നാണ് പലരും അഭിപ്രായപ്പെട്ടിരുന്നു.

നിമിഷയുടെ കഥാപാത്രത്തിന്റെ പ്രകടനത്തെക്കുറിച്ചും മികച്ച പ്രേക്ഷക പ്രതികരണമാണ് ലഭിച്ചത്. ജോജു ജോര്‍ജിന് കരിയര്‍ ബ്രേക്ക് നല്‍കിയ 'ജോസഫി'ന്‍റെ തിരക്കഥാകൃത്ത് ഷാഹി കബീര്‍ ആണ് നായാട്ടിനും രചന നിര്‍വ്വഹിച്ചിരിക്കുന്നത്.

സര്‍വൈവല്‍ ത്രില്ലര്‍ ആണ് ചിത്രം. ഗോള്‍ഡ് കോയിന്‍ മോഷന്‍ പിക്ചര്‍ കമ്പനി, മാര്‍ട്ടിന്‍ പ്രക്കാട്ട് ഫിലിംസ് എന്നീ ബാനറുകളില്‍ സംവിധായകന്‍ രഞ്ജിത്ത്, പി എം ശശിധരന്‍, മാര്‍ട്ടിന്‍ പ്രക്കാട്ട് എന്നിവര്‍ ചേര്‍ന്നാണ് നിര്‍മ്മാണം.

ഷൈജു ഖാലിദ് ആണ് ഛായാഗ്രഹണം. 'ചാര്‍ലി' പുറത്തിറങ്ങി ആറ് വര്‍ഷത്തിനു ശേഷമാണ് മാര്‍ട്ടിന്‍ പ്രക്കാട്ട് പുതിയ ചിത്രവുമായി എത്തുന്നത്.

### Related Links & Sources
- [Original Story Source](https://moviemax.in/news/3007/gautham-menon-to-prepare-tamil-for-non-hunting-languages-the-remake-is-being-prepared-in-hindi-and-telugu)