---
title: "ആൻഡ്രോയ്ഡ് കുഞ്ഞപ്പന്' രണ്ടാം ഭാഗം; 'ഏലിയൻ അളിയൻ' ഉടൻ"
english_title: "Android Baby 'Part Two; 'Alien Alien' coming soon"
publisher: "moviemax.in"
canonical_url: "https://moviemax.in/news/2784/android-baby-part-two-alien-alien-coming-soon"
published_at: "2021-10-04T21:49:00+05:30"
category: "Malayalam"
language: "ml"
image: "https://cf.zdn.im/img/truevisionnews.com/0/image-uploads/60e92a3df4226_aalian kunjappan.jpg"
keywords: []
---

# ആൻഡ്രോയ്ഡ് കുഞ്ഞപ്പന്' രണ്ടാം ഭാഗം; 'ഏലിയൻ അളിയൻ' ഉടൻ

> **Lead Summary:** മൂൺഷോട്ട് എന്‍റർടെയ്ൻമെന്‍റിന്‍റെ ബാനറിൽ സന്തോഷ് ടി കുരുവിള നിർമിച്ച് രതീഷ് ബാലകൃഷ്ണൻ പൊതുവാൾ സംവിധാനം ചെയ്ത സിനിമയാണ് ‘ആൻഡ്രോയ്ഡ് കുഞ്ഞപ്പൻ 5.25’.

## Article Content

മൂൺഷോട്ട് എന്‍റർടെയ്ൻമെന്‍റിന്‍റെ ബാനറിൽ സന്തോഷ് ടി കുരുവിള നിർമിച്ച് രതീഷ് ബാലകൃഷ്ണൻ പൊതുവാൾ സംവിധാനം ചെയ്ത സിനിമയാണ് ‘ആൻഡ്രോയ്ഡ് കുഞ്ഞപ്പൻ 5.25’.

സൗബിൻ ഷാഹിറും സുരാജ് വെഞ്ഞാറമൂടും കേന്ദ്ര കഥാപാത്രങ്ങളായെത്തിയ ചിത്രം മികച്ച പ്രേക്ഷക നിരൂപക പ്രശംസ നേടിയിരുന്നു. ഒരച്ഛനും മകനും അവർക്കിടയിലെ ഒരു റോബോട്ട് അഥവാ ഹ്യൂമനോയിഡുമായുള്ള ബന്ധമാണ് ചിത്രം പറഞ്ഞത്.

മലയാളത്തിൽ ഏറെ പുതുമയുള്ള ഈ പ്രമേയം ഏറെ രസകരമായാണ് ചിത്രത്തിൽ അവതരിപ്പിച്ചിരുന്നത്. ഇപ്പോഴിതാ കുഞ്ഞപ്പൻ വീണ്ടും എത്താനൊരുങ്ങുകയാണ്.

ആൻഡ്രോയ്ഡ് കുഞ്ഞപ്പന് രണ്ടാം ഭാഗം ഒരുങ്ങുന്നതായി നിര്‍മ്മാതാവ് സന്തോഷ് ടി കുരുവിള സോഷ്യൽമീഡിയയിലൂടെ അറിയിച്ചിരിക്കുകയാണ്.

രതീഷ് ബാലകൃഷ്ണൻ പൊതുവാൾ തന്നെ രചനയും സംവിധാനവും നിർവഹിയ്ക്കുന്ന ഈ ചിത്രത്തിന് ഏലിയൻ അളിയൻ എന്നാണ് ടൈറ്റിൽ നൽകിയിരിക്കുന്നത്.

എസ്.ടി.കെ ഫ്രെയിംസിന്‍റെ ബാനറിൽ സന്തോഷ് ടി. കുരുവിളയാണ് ചിത്രം നിർമ്മിയ്ക്കുന്നത് . പ്രായമേറിയുള്ള കഥാപാത്രമായി വിസ്മയിപ്പിക്കുന്ന പ്രകടനമാണ് ചിത്രത്തിൽ സുരാജ് വെഞ്ഞാറമൂട് നടത്തിയത്.

2019-ലെ മികച്ച നടനുള്ള കേരളസംസ്ഥാന ചലച്ചിത്രപുരസ്കാരം ആൻഡ്രോയ്ഡ് കുഞ്ഞപ്പൻ, വികൃതി എന്നീ സിനിമകളിലൂടെയാണ് സുരാജിന് ലഭിച്ചത്.

### Related Links & Sources
- [Original Story Source](https://moviemax.in/news/2784/android-baby-part-two-alien-alien-coming-soon)