സ്ത്രീധന സമ്പ്രദായം തന്നെ എടുത്തുമാറ്റണമെന്നും സ്ത്രീധനം ചോദിച്ചുവരുന്നവർക്ക് പെൺകുട്ടികളെ കെട്ടിച്ചുകൊടുക്കരുതെന്ന് മാതാപിതാക്കൾ തീരുമാനിക്കണമെന്നും നടൻ ജഗതിയുടെ മകൾ പാർവതി ഷോൺ. ശൂരനാട് ഭർതൃവീട്ടിൽ യുവതി തൂങ്ങിമരിച്ച സംഭവത്തിൽ പ്രതികരിക്കുകയായിരുന്നു പാർവതി ഷോൺ.
പാര്വതിയുടെ വാക്കുകൾ:
രാവിലെ ഞാൻ വാർത്ത നോക്കുകയായിരുന്നു. യുവതി ഭർതൃവീട്ടിൽ തൂങ്ങി മരിച്ച നിലയിൽ. പീഡനമെന്ന് ബന്ധുക്കൾ. എന്താല്ലെ, മാളു 24 വയസ്സ് മാത്രമാണ് ആ കുട്ടിക്കുള്ളത്. വിവാഹം കഴിച്ചിട്ട് ഒരു വർഷം.
എന്നാണ് നമ്മളൊക്കെ മാറുക, നമ്മൾ മാതാപിതാക്കൾ പഠിക്കേണ്ട ഒരു കാര്യമുണ്ട്. പെൺകുട്ടികളെ വളർത്തിക്കൊണ്ട് വരുമ്പോൾ അവർക്ക് ആത്മവിശ്വാസം കൊടുക്കുക, നല്ല വിദ്യാഭ്യാസം കൊടുക്കുക. എന്തുവന്നാലും അത് നേരിടാനും വെല്ലുവിളിക്കാനുമുള്ള മനസ്സ് ഉണ്ടാക്കി കൊടുക്കുക. അവളെ സ്വയംപര്യാപ്തയാക്കുക.
ഇതൊക്കെയാണ് അവർക്ക് കൊടുക്കാൻ പറ്റുന്ന ഏറ്റവും നല്ല ധനം. അല്ലാതെ പ്രായപൂർത്തിയാകുമ്പോഴെ കെട്ടിച്ചുവിടുകയല്ല വേണ്ടത്. സ്ത്രീധനം മേടിച്ച് മൂന്ന് നേരം തിന്നാൻ നിൽക്കുന്ന ആൺപിള്ളേരെ പറഞ്ഞാൽ മതി. ഭാര്യമാരെ ബഹുമാനിക്കാൻ പഠിക്ക്, അവളെ സ്നേഹിക്ക്.
കല്യാണം കഴിച്ച് ഒരു കുടുംബത്തിലേയ്ക്ക് വരുമ്പോൾ ആ കുടുംബഭാരം മുഴുവൻ നമ്മുടെ തലയിലാകും. ഇതൊക്കെ പറയുമ്പോൾ എന്നെ ചിലർ കുറ്റം പറയുമായിരിക്കും. പത്ത് മാസം ഇവന്റെയൊക്കെ പിള്ളേരെ നൊന്തുപ്രസവിക്കുമ്പോൾ നമുക്ക് ഇങ്ങോട്ട് സ്ത്രീധനം തരണം. ഇല്ലെങ്കിൽ ഈ സമ്പ്രദായം എടുത്തുമാറ്റണം. വിവാഹം കഴിച്ചുപോകുന്ന പെണ്കുട്ടിക്ക് എന്തെങ്കിലും കൊടുക്കാനുണ്ടെങ്കിൽ അത് അവളുടെ പേരിൽ കൊടുക്കണം. അവളുടെ ജീവിതം സുരക്ഷിതമാക്കണം. വേറൊരു വീട്ടിലേയ്ക്ക് കയറി ചെല്ലുന്ന െപൺകുട്ടിയെ അവർ നോക്കുമെന്ന് എന്ത് ഉറപ്പാണുള്ളത്. സ്ത്രീധന സമ്പ്രദായം എടുത്തുമാറ്റണം. സ്ത്രീധനം ചോദിച്ചുവരുന്ന ഒരുത്തനും നമ്മുടെ കുട്ടിയെ കെട്ടിച്ചുകൊടുക്കരുത്. സ്ത്രീയാണ് ധനം. അതോർക്കുക.
"എന്റെ ചേച്ചി ഇത് കേരളമാണ് ഇവിടെ ഇതിലും വലുത് നടക്കും. ഇതിനു എതിരെ ഒരു നിയമം പോലും വരില്ല. നിയമം കർശനമാക്കിയാൽ തീരാവുന്ന പ്രശ്നം മേ ഒള്ളു അതിന് ഇവിടത്തെ സർക്കാർ മുൻ കൈ എടുക്കണം. ഈ കച്ചവട കണ്ണോടെ പെണ്ണ് കാണാൻ വരുന്ന നാറി കളെ ചൂല് കൊണ്ടു അടിക്കുന്ന നിയമം വരണം ,അതു എങ്ങനെയാ മലയാളിക് status അല്ലെ വലുത്"
"ഗ്രേറ്റ് . ഓരോ ആൾക്കാരെ മനസ്സിലും ഇതൊക്കെ തന്നെയാണ്. പക്ഷേ പറയാൻ അത് മടി കാണിക്കുന്നു. പിന്നെയും ഓരോ തെറ്റിലേക്ക് തന്നെ നമ്മുടെ നാട്ടുകാർ പോകുന്നു.പാവം ഓരോ പെണ്കുട്ടികളും ബലിയാടുകൾ ആകുന്നു. വളരെയധികം വിഷമം ഉണ്ട്. പ്രണാമം".തുടങ്ങി നിരവധി കമന്റുകള് വീഡിയോയ്ക്ക് താഴെ വരുന്നുണ്ട് .പാര്വതി തന്റെ ഫേസ് ബുക്ക് പേജില് കൂടിയാണ് വീഡിയോ പങ്കുവെച്ചിരിക്കുന്നത് .
Content Highlight: Learn to respect your wife, love her- Actor Jagathy's daughter; Video Viral
