തീയേറ്ററുകളില് വലിയ തരംഗം സൃഷ്ടിച്ച ജനപ്രിയ സിനിമ ഓപറേഷന് ജാവ മേയ് 15ന് വൈകീട്ട് ഏഴിന് പ്രേക്ഷകരുടെ സ്വീകരണമുറികളിലെത്തുന്നു. മലയാളികളുടെ ഏറെ പ്രിയപ്പെട്ട വിനോദ ചാനലായ സീ കേരളം ചാനലിലൂടെയാണ് സിനിമ സംപ്രേഷണം ചെയ്യുന്നത്. നവാഗത സംവിധായകന് തരുണ് മൂര്ത്തി ഒരുക്കിയ ഈ സിനിമ പ്രേക്ഷകരുടേയും നിരൂപകരുടേയും പ്രശംസ നേടിയിരുന്നു. സമകാലിക സാമൂഹിക പ്രശ്നങ്ങളെ കോര്ത്തിണക്കി പോലീസിന്റെ കുറ്റാന്വേഷണ രീതികളെ മികച്ച രീതിയില് ആവിഷ്കരിച്ചതിലൂടെ ഏറെ ശ്രദ്ധയും ഈ ചിത്രം നേടിയിരുന്നു.
കൃഷ്ണൻകുട്ടി പണി തുടങ്ങി, വൂൾഫ് എന്നീ ഹിറ്റ് ചിത്രങ്ങളുടെ ആദ്യ ടെലിവിഷൻ ടെലികാസ്റ്റിനു ചാനലിന് വൻ സ്വീകാര്യത ലഭിച്ചിരുന്നു. അതിനു ശേഷം എത്തുന്ന ഓപറേഷന് ജാവയും കുടുംബപ്രേക്ഷകരെ പ്രീതിപ്പെടുത്തും എന്ന കാര്യം ചാനൽ അധികൃതർ ഉറപ്പേകുന്നു. ബാലു വര്ഗീസ്, ഇര്ഷാദ്, ബിനു പപ്പു, മാത്യു തോമസ് ,സുധി കോപ്പ, ദീപക് വിജയന്, ലുക്ക്മാന്, പി ബാലചന്ദ്രന്, വിനായകന്, ധന്യ അനന്യ, മമിത ബൈജു, പ്രശാന്ത് അലക്സാണ്ടര് തുടങ്ങിയവരാണ് ചിത്രത്തിൽ പ്രധാന കഥാപാത്രങ്ങളെ അവതരിപ്പിക്കുന്നത്. ഛായാഗ്രഹണം ഫായിസ് സിദ്ദിഖ് നിർവ്വഹിച്ചപ്പോൾ ജെയ്ക്സ് ബിജോയ് ആണ് സംഗീതം നല്കിയിരിക്കുന്നത്.
കുറ്റാന്വേഷണ സിനിമയാണെങ്കിൽ കൂടി ഈ ചിത്രം കേരളത്തില് തൊഴിലില്ലാതെ അലയുന്ന അഭ്യസ്ഥവിദ്യരായ എല്ലാവരെയും പ്രതിനിധാനം ചെയ്യുന്നുണ്ട്. കേന്ദ്രകഥാപാത്രങ്ങളിലൂടെ അവരുടെ ജീവിതത്തെ പ്രേക്ഷകരുമായി സംവിധായകൻ ബന്ധപ്പെടുത്തുന്നു. തൊഴിൽ സമരവുമായി ബന്ധപ്പെട്ട് ഉദ്യോഗാർഥികൾ ഇപ്പോൾ നടത്തുന്ന സമരത്തെ സിനിമ കാണുന്ന പലരും ഒാർമിച്ചേക്കാം. അഞ്ചാം പാതിരയ്ക്കു ശേഷം മലയാളത്തിലിറങ്ങിയ ലക്ഷണമൊത്ത ഇൻവെസ്റ്റിഗേഷൻ ത്രില്ലറാണ് ഇൗ ചിത്രം. വലിയ താരങ്ങളില്ലെങ്കിലും സ്ക്രീനിൽ നിന്നു കണ്ണെടുക്കാതെ ഇൗ സിനിമ കണ്ടിരുന്നു പോകും നാം.
Content Highlight: 'Operation Java' ready for TV release
