ഹാസ്യ കഥാപാത്രങ്ങളിലൂടെ പ്രേക്ഷകരുടെയെല്ലാം പ്രിയങ്കരനായി മാറിയ താരമാണ് സലീം കുമാര്. നസംവിധായകനും മിമിക്രിതാരവുമൊക്കെയായ താരം തന്റെ പേര് സലീം കുമാര് എന്ന് വന്നതിന്റെ പിന്നിലെ കഥ ഒരു അഭിമുഖത്തിലൂടെ പങ്കുവെച്ചു. അന്ന് സഹോദരന് അയ്യപ്പന്റെ ആശയങ്ങളില് ആകൃഷ്ടരായ മാതാപിതാക്കള് മക്കള്ക്ക് ജാതി തിരിച്ചറിയാത്ത പേരുകള് ഇടാന് തുടങ്ങി. അങ്ങനെയാണ് തനിക്ക് സലീം എന്ന പേര് വന്നത്. എന്നാല് ഈ പേരിനൊപ്പം കുമാര് എന്നത് കൂടി വന്നതെങ്ങനെയാണെന്നും താരം വിശദീകരിക്കുകയാണ്. ഉദ്ദാഹരണത്തിന് എന്റെ പേര് സലീം.
അതുപോലെ ജലീല്, ജമാല്, നൗഷാദ് എന്നീ പേരുകളൊക്കെ ഈഴവരായിട്ടുള്ള ഹിന്ദു കുട്ടികള്ക്ക് ഇടാന് തുടങ്ങി. ഈ സലീം എന്ന പേരും കൊണ്ട് ചിറ്റാറ്റുപുഴ എല്പിഎസില് ചേര്ക്കാന് ചെന്നു. അവിടെ വച്ച് സലീം എന്ന പേര് കേട്ടപ്പോള് ഇത് മുസ്ലീം കുട്ടിയുടെ പേര് ആണെന്ന് സ്കൂള് അധികൃതര് പറഞ്ഞു. അച്ഛനും അന്ന് ഇതേ കുറിച്ച് ധാരണ ഉണ്ടായിരുന്നില്ല. അവിടെ വച്ച് അധ്യാപകര് പേരിനൊപ്പം കുമാര് എന്ന് കൂടി ചേര്ത്താല് മതിയെന്ന് പറഞ്ഞു. അങ്ങനെ സലീമിനൊപ്പം കുമാര് കൂടി ചേര്ത്ത് എന്നെ ഹിന്ദുവാക്കി. അഞ്ചാം ക്ലാസ് വരെ ഞാന് മുസ്ലീമായിരുന്നു.
അഞ്ചാം ക്ലാസിന് ശേഷം ഞാന് വിശാല ഹിന്ദുവായെന്നാണ് നടന് തമാശരൂപേണ പറയുന്നത്. ഞങ്ങൾ എട്ട് മക്കളായത് കൊണ്ട് തന്നെ ഞങ്ങള്ക്ക് ജാതകം എഴുതിയിട്ടില്ല. കാരണം അത്രയും പേര്ക്ക് എഴുതാന് ഒത്തിരി കാശ് ആവും. വര്ഷങ്ങള്ക്ക് ശേഷം എന്റെ മൂത്തമകന്റെ ജാതകം എഴുതിക്കുമ്പോള് എനിക്കുമൊരു ജാതകം വേണമെന്ന് തോന്നി. അങ്ങനെ അമ്മയോട് പോയിട്ട് എന്റെ ജനനതീയ്യതി ചോദിച്ചു. അപ്പോള് അമ്മ പറഞ്ഞു, കടയിലെ അമ്പിയുടെ അമ്പത്തിയാറിനാണ് നിന്നെ പ്രസവിച്ചതെന്ന്. അമ്പി എന്ന് പറഞ്ഞാല് എന്റെ വീടിന്റെ അടുത്ത വീട്ടിലുള്ള പെണ്കുട്ടിയാണ്. അവളോട് പോയി ചോദിച്ചപ്പോള് അവള്ക്കും അറിയില്ല.
അങ്ങനെ ഒരു ദിവസം നടന് ജനാര്ദ്ദനന് ചേട്ടനെ കണ്ടപ്പോള് എനിക്കിങ്ങനെ ജാതകം എഴുതിക്കണമെന്ന് പറഞ്ഞു. അതിനെന്താണ് കംപ്യൂട്ടര് ജാതകമുണ്ട്. കൊടുത്താല് അപ്പോള് കിട്ടുമെന്ന് പുള്ളി പറഞ്ഞു. 1969 ലാണ് ജനനം, കന്നി മാസമാണ്, ആയില്യമാണ് നാളെന്നും പറഞ്ഞു. അങ്ങനെ എനിക്കും കിട്ടി ഒരു ജാതകം. അതില് കൃത്യമായി എഴുതിയിരിക്കുകയാണ് ഞാനൊരു മിമിക്രിക്കാരനാകുമെന്നും സിനിമാക്കാരനാകുമെന്നും ഒക്കെ. ഞാനത് കണ്ട് ഞെട്ടി പോയി. ജാതകത്തിന് ഇത്ര ശക്തിയുണ്ടോന്ന് വിചാരിച്ചു. അന്ന് എന്റെ ജാതകം എഴുതാന് എളുപ്പമായിട്ടുണ്ടാവും. കാരണം സലീം കുമാറിനൊരു ജാതകം വേണമെന്ന് പറഞ്ഞപ്പോള് ഗൂഗിളില് നോക്കിയാല് മതിയല്ലോ എന്ന് നടന് തമാശരൂപേണ പറയുന്നു.
Content Highlight: #Iwas #Muslim #until #class5 #became #Hindu #SalimKumar #openup
