---
title: "എന്റെ അച്ഛന് വേണ്ടി ഇത്രയെങ്കിലും ഞാന്‍ ചെയ്യണ്ടേ...; 'രോമാഞ്ചം' വീഡിയോ വൈറല്‍"
english_title: "Shouldn't I do this much for my father...; 'Romancham' video goes viral"
publisher: "moviemax.in"
canonical_url: "https://moviemax.in/news/109593/shouldnt-i-do-this-much-for-my-father-romancham-video-goes-viral"
published_at: "2023-04-18T13:54:00+05:30"
category: "Malayalam"
language: "ml"
image: "https://cf.zdn.im/img/truevisionnews.com/0/image-uploads/643e540445200_arjunashok.jpg"
keywords: []
---

# എന്റെ അച്ഛന് വേണ്ടി ഇത്രയെങ്കിലും ഞാന്‍ ചെയ്യണ്ടേ...; 'രോമാഞ്ചം' വീഡിയോ വൈറല്‍

> **Lead Summary:** ഈ വര്‍ഷത്തെ ഹിറ്റ് സിനിമകളില്‍ ഒന്നാണ് ‘രോമാഞ്ചം’. 70ല്‍ അധികം സിനിമകള്‍ ഇതിനോടകം തന്നെ മലയാളത്തില്‍ റിലീസ് ചെയ്തിട്ടുണ്ട്. അതില്‍ തിയേറ്റര്‍ വിജയം നേടിയത് രോമാഞ്ചം മാത്രമാണ്.

## Article Content

ഈ വര്‍ഷത്തെ ഹിറ്റ് സിനിമകളില്‍ ഒന്നാണ് ‘രോമാഞ്ചം’. 70ല്‍ അധികം സിനിമകള്‍ ഇതിനോടകം തന്നെ മലയാളത്തില്‍ റിലീസ് ചെയ്തിട്ടുണ്ട്. അതില്‍ തിയേറ്റര്‍ വിജയം നേടിയത് രോമാഞ്ചം മാത്രമാണ്.

ചിത്രത്തില്‍ ഏറെ ശ്രദ്ധ നേടിയ കഥാപാത്രമാണ് അര്‍ജുന്‍ അശോകന്‍ അവതരിപ്പിച്ച സിനുമോന്‍ എന്ന കഥാപാത്രം. രോമാഞ്ചത്തില്‍ എലിശല്യമുള്ള വീട്ടില്‍ താമസിക്കുമ്പോള്‍ സിനുമോന്‍ എലിയെ കണ്ടപ്പാടെ അതിനെ മതിലില്‍ എറിഞ്ഞ് കൊല്ലുന്നത് കാണാം.

സിനുമോന് എലികളോട് എന്താണിത്ര ദേഷ്യമെന്നതിനുള്ള ഉത്തരം കണ്ടെത്തിയിരിക്കുകയാണ് സോഷ്യല്‍ മീഡിയ. പാസ്‌പോര്‍ട്ട് കരണ്ട് തിന്ന എലിയെ കൊല്ലാനായി ബസിന്റെ ലിവറുമായി ഇറങ്ങിയ ‘ഈ പറക്കും തളിക’ സിനിമയിലെ ഹരിശ്രീ അശോകന്‍ അവതരിപ്പിച്ച കഥാപാത്രത്തെയും രോമാഞ്ചത്തില്‍ അര്‍ജുന്‍ അശോകന്‍ അവതരിപ്പിച്ച കഥാപാത്രത്തെയും ബന്ധപ്പെടുത്തിയിരിക്കുകയാണ് ട്രോളന്‍മാര്‍ ഇപ്പോള്‍.

സുന്ദരന്റെ ആജീവനാന്ത ശത്രുവായ എലിയെ ഓടിച്ചിട്ട് പിടിച്ച് വകവരുത്തി സിനുമോന്‍ എന്നാണ് ട്രോളന്മാര്‍ പറയുന്നത്. പറക്കും തളികയിലെയും രോമാഞ്ചത്തിലെയും സീനുകള്‍ ഉള്‍പ്പെടുത്തിയുള്ള വീഡിയോയാണ് സോഷ്യല്‍ മീഡിയയില്‍ പ്രചരിക്കുന്നത്.

ചിത്രത്തില്‍ എലികളെ സിനു കൊല്ലുന്നതും കുഴിച്ചിടുന്നതുമായ രംഗങ്ങള്‍ വീഡിയോയില്‍ ഉള്‍ക്കൊള്ളിച്ചിട്ടുണ്ട്. അച്ഛന് കൊടുത്ത വാക്ക് സിനുമോന്‍ പാലിച്ചെന്നാണ് സോഷ്യല്‍ മീഡിയ പറയുന്നത്. അതേസമയം, ജിത്തു മാധവന്‍ സംവിധാനം ചെയ്ത രോമാഞ്ചം ഫെബ്രുവരി 3ന് ആണ് തിയേറ്ററുകളിലെത്തിയത്.

### Related Links & Sources
- [Original Story Source](https://moviemax.in/news/109593/shouldnt-i-do-this-much-for-my-father-romancham-video-goes-viral)